🚩 नरक चतुर्दशी व अभ्यंग स्नानामागील साधनाशास्त्र

MH 13 NEWS NETWORK

🚩 दिवाळीच्या एक दिवस आधी, छोटी दिवाळी साजरी केली जाते. ज्याला नरक चतुर्दशी असे म्हणतात. हिंदू मान्यतेनुसार या दिवशी विधीनुसार देवाची पूजा केल्याने व्यक्ती सर्व प्रकारच्या पापांपासून मुक्त होते. नरक चतुर्दशी पासून दीपावली सुरू होते.

🚩 भल्या पहाटे भगवान श्रीकृष्ण आणि अर्जुन गेले, त्यांनी नरकासुराचा वध करून त्याच्या बंदिवासात असलेल्या १६,१०० स्त्रियांना मुक्त केले आणि हस्तिनापुरला परत आले. नरकासुराला मारल्यामुळे त्याचे नरकतुल्य रक्त श्रीकृष्णार्जुनांच्या अंगावर सांडल्याने त्यांनी भल्या पहाटेसच अभ्यंगस्नान केले आणि ते नरकासुराच्या पापातून मुक्त झाले.

🚩 नरक चतुर्दशीलाच त्यांनी असले अभ्यंग स्नान केल्याने तेव्हा पासून आपण नरक चतुर्दशीला भल्या पहाटे उठून सूर्योदयापूर्वीच स्नान करतो आणि जो असे ब्राह्ममुहूर्ती स्नान करणार नाही त्याच्या अंगावर नरक पडेल असे मानतो.

🚩 कथेच्याच दृष्टीने विचार केल्यास असे दिसून येईल की, नरकासुराला मारले श्रीकृष्णार्जुनांनी व त्याचे नरकतुल्य रक्त त्यांच्या अंगावर सांडले, मग त्याकरीता शुध्द होण्याकरिता त्यांनीच स्नान करावयास हवे.

🚩 पांडवांचा काळ आजपासून सहा सहस्रवर्षांपूर्वीचा मानल्यास त्यांनी तसले अभ्यंगस्नान सहा सहस्त्र वर्षापूर्वीच केले. आता ते स्नान आम्हाला दरवर्षी करण्याची काय आवश्यकता?

🚩 नरक चतुर्दशीचे साधनाशास्त्र समजण्याकरिता आपल्याला त्यातील प्रत्येक शब्दाचा सखोल साधना अर्थ समजावा लागेल.

🚩⚜️🌹 साधकाच्या शरीरात ज्या सहस्त्रावधी म्हणजे ठोकळमानाने १६,१०० योगनाड्या असतात, त्या अत्यंत प्राकृतिक असल्या की, त्याद्वारे प्रत्येक जीवात्मा या अनंत विश्वातील शक्तिप्रवाह कर्षण करून आपली जीवन यात्रा चालवीत असतो.

🚩 या नाड्या मोकळ्या म्हणजे प्रकृतिस्थ असतील तरच हे कर्षण सहज सुलभ होऊन जीवात्मा अधिक उत्क्रांत होत जातो. असल्या प्रकृतिस्थ शरीरातील जीवात्म्यालाच श्रीकृष्ण असे म्हणतात, ‘कर्षति इति कृष्ण:’ साधकाची असली परमसंपन्न अवस्था म्हणजेच भगवान श्रीकृष्ण होत. परंतु तसल्या शुध्द आणि योग्य कर्माला उत्तेजन देणारी साधकाची जी उत्क्रांत वृत्ती तिला अर्जुन असे म्हणतात.

🚩 वेदात हा ‘अर्जुन’ आणि ‘अर्जुनी’ शब्द बरेच वेळा आला आहे आणि त्याचा प्रत्येक वेळेस अर्थ वरील प्रमाणेच आहे. या अर्थाने ती अर्जुन उत्क्रांत वृत्ती सहा सहस्र वर्षापूर्वी न होता आजही प्रत्येक प्रयत्नशील साधकाच्या रूपाने जिवंतच आहे. मग भगवान श्रीकृष्ण आणि अर्जुन जर आजही आपल्या हृदयात जिवंत असतील तर नरकासुराचे राज्यही आपल्यातच असायला पाहिजे हे खरे आहे.

🚩 असाधकावस्थेतील शरीराच्या योगनाड्या शुध्दावस्थेत नसल्याने प्रवाहित नसतात. त्या आपल्या वाईट कर्माने तुंबल्या असल्याने त्यातून विश्वाच्या शक्ती आपल्या मध्ये कर्षित केल्या जात नाहीत आणि साधनेत प्रगती नसलेल्या साधकाचे शरीर तुंबलेल्या घाण पाण्याप्रमाणे जागच्या जागी नरकाप्रमाणे सडत राहते, न सरकणारा तो नरक, म्हणजे जड अज्ञानमय जीवन जगणारे मानवी शरीर, म्हणजे नरकासुर होय.

🚩 सावध साधक आपल्या प्रेरणाशक्तीने आपल्या शरीराला साधनेद्वारे अत्यंत प्राकृतिक करून त्यातील नरकासुराला मारतो. वाईट सवयींचा नायनाट करतो.सावध साधक म्हणजे भगवान श्रीकृष्ण आणि त्याची प्रेरणा देणारी उत्तेजक शक्ती म्हणजे अर्जुन होय.

🚩 शरीरातील नरकासुराचा नाश म्हणजे वध झाल्यावर साधकाच्या शरीरातील ज्या १६,१०० नाड्या नरकासुराच्या बंदिवासात होत्या त्या भगवान श्रीकृष्णाच्या परम प्रतापाने मुक्त होऊन पुन्हा प्राकृतिक झाल्या, त्यातून विश्वशक्तीचे कर्षण पूर्ववत झाल्यामुळे त्या नाड्या भगवान श्रीकृष्ण रूपी साधकाला नाहीतर कोणाला वरणार ?

🚩 भगवान श्रीकृष्णाने अशा तऱ्हेने नरकासुराच्या बंदिवासातील १६,१०० कुमारिका मुक्त करून त्यांच्याशी लग्न केले. साधकाच्या त्या परमपावन क्षणाचे स्मरण म्हणजेच ही नरक चतुर्दशी होय. नरकासुराला श्रीकृष्णार्जुनांनी मोठ्या पहाटे मारले. योगिजन मोठ्या पहाटेसच साधना करीत असतात.

🚩 नरकासुराने इतक्या सहस्रावधी संख्येत देशोदेशीच्या कुमारिकांचे अपहरण करावे आणि त्या काळातील पराक्रमी आर्यांनी त्यांचा तो अत्याचार उघड्या डोळयांनी पाहावा काय? त्यावेळचे महान पराक्रमी आर्य पराक्रमहीन झाले होते काय ? मग या नरकासुराने कोणत्या कुमारिकांना पळवून डांबून ठेवले ?

🚩 साधकाच्या शरीरातील असंख्य योगनाड्या म्हणजेच त्या १६,१०० कुमारिका होत, भगवान श्रीकृष्णाच्या १६,१०० आणि त्यापूर्वीच्या आठ स्त्रिया( अष्टांगयोग ) मिळून आता श्रीकृष्णाला १६,१०८ स्त्रिया झाल्या. परकीय लोक तर आमच्या अशा १६,१०८ स्त्रियांचा दादला असलेला परमेश्वर पाहून आमच्या धर्मकल्पनांची थट्टा करतात. याचे कारण भगवान श्रीकृष्ण म्हणजे कोण ? त्यांनी सोडविलेल्या १६,१०० स्त्रिया म्हणजे कोणत्या याचे आपल्याला पूर्ण अज्ञान आहे.

🚩 ‘शिवो भूत्वा शिवं यजेत’ जीवनभर कठोर साधनांचे कष्ट उपसावे लागतात तेव्हा कोठे साधना पदरी पडतात. योगी वा सत्पुरुषाचे सोंग आणून कोणीच संत महात्मे बनू शकणार नाही. त्यामुळे फार फार तर असले भोंदू बुवा दोन चार लोकांना आपल्या नादी लावतील.

🚩 अध्यात्मात साधकाचा जर मोठा शत्रू कोण असेल तर तो ढोंग आणि फसवणूक होय. असले धूर्त पुरूष समाजाला फसवून पर्यायाने स्वतःचीच फसगत करीत असतात आणि शेवटी स्वतःमध्येच एक अत्याधुनिक नरकासुर उत्पन्न करीत असतात. असल्या नरकासुरांना मारणे हेच श्रीकृष्णाचे कर्तव्य होय. जागृत तरुणांनी असल्या ढोंगी, बुवांना वठणीवर आणण्यास तत्पर असावे.