mh 13 news network
बाळे (सोलापूर) | प्रतिनिधी :
महिलांच्या आर्थिक स्वावलंबनाला चालना देण्यासाठी आणि पर्यटन क्षेत्रातील उद्योजक संधी उपलब्ध करून देण्याच्या उद्देशाने लोकमंगल परिवाराच्या पुढाकारातून, पर्यटन संचालनालय प्रादेशिक पर्यटन कार्यालय पुणे व श्रीक्षेत्र खंडोबा देवस्थान, बाळे यांच्या संयुक्त विद्यमा नाने ‘आई पर्यटन’ योजनेअंतर्गत महिला उद्योजकांसाठी व्यवसायिक कर्ज व उद्योजक शिबिराचे आयोजन करण्यात आले आहे.
हा उपक्रम महाराष्ट्र शासनाच्या ‘आई पर्यटन’ योजनेंतर्गत राबविण्यात येत असून, गुरुवार दि. ५ फेब्रुवारी २०२६ रोजी सकाळी १०.३० वाजता श्रीक्षेत्र खंडोबा देवस्थान, बाळे (ता. उत्तर सोलापूर) येथे शिबिर संपन्न होणार आहे.
या कार्यक्रमाचे अध्यक्षस्थान मा. श्री. विनय ढेपे, अध्यक्ष श्रीक्षेत्र खंडोबा देवस्थान, बाळे हे भूषविणार असून, मा. श्री. भरत लांगी, मा. उपसंचालक, पर्यटन संचालनालय, पुणे व फौजदार चावडीचे वरिष्ठ पोलीस निरीक्षक श्री महादेव राऊत हे प्रमुख अतिथी व मार्गदर्शक म्हणून उपस्थित राहणार आहेत. कार्यक्रमास लोकमंगल परिवाराचे संस्थापक अध्यक्ष तसेच आमदार दक्षिण सोलापूर आ. सुभाष (बापू) देशमुख यांचे विशेष मार्गदर्शन लाभणार आहे.
या शिबिरामध्ये महिलांना पर्यटन क्षेत्रातील विविध व्यवसाय संधींबाबत सविस्तर माहिती देण्यात येणार असून, शासनाच्या विविध योजनांचा लाभ कसा घ्यावा याबाबत मार्गदर्शन करण्यात येईल. विशेष म्हणजे या योजनेअंतर्गत १५ लाख रुपयांपर्यंतचे कर्ज नियमित परतफेड केल्यास १२ टक्क्यांपर्यंत व्याज परतावा मिळणार आहे.
‘आई पर्यटन’ योजनेंतर्गत महिलांसाठी खालील प्रकारचे व्यवसाय सुरू करण्यास प्रोत्साहन देण्यात येणार आहे.
टूर्स अँड ट्रॅव्हल एजन्सी, साहसी पर्यटन, पर्यटन सुविधा केंद्र, कृषी पर्यटन केंद्र, होम-स्टे, निवासी न्याहारी, रिसॉर्ट, मोटेल, रेस्टॉरंट, टेंट, ट्री हाऊस, प्रसाद विक्री दुकाने, निर्माल्य व्यवस्थापन, विविध खाद्यपदार्थ विक्री, इव्हेंट मॅनेजमेंट, महिला संचालित कॉमन किचन, कॅफे, बेकरी, टूर ऑपरेटर, पर्यटन व्हिला, ट्रॅव्हल एजंट, टूर मार्गदर्शक, स्थानिक उत्पादन विक्री केंद्र, उपहारगृह, फास्ट फूड, टुरिस्ट ट्रान्सपोर्ट ऑपरेटर, ई-वाहने (रिक्षा, बस, चारचाकी), मेडिकल टुरिझम, वेलनेस सेंटर, आयुर्वेद योग केंद्र, हँडिक्राफ्ट (हस्तकला कलाकार), सुव्हेनिअर शॉप तसेच कला व संस्कृतीशी संबंधित उपक्रम.
या शिबिरामध्ये सहभागी होणाऱ्या महिलांना प्रत्यक्ष मार्गदर्शन, अर्ज प्रक्रिया, कर्ज योजना, व्यवसाय नियोजन आणि शासकीय सवलती यांची सविस्तर माहिती दिली जाणार आहे.
अधिक माहितीसाठी व नोंदणीसाठी
सागर जाधव – 7875475857,
चारुदत्त बिराजदार – 9075397836,
सौ. साधना डोंगरे – 9168399599,
प्रशांत क्षीरसागर – 9763616139
या क्रमांकांवर संपर्क साधण्याचे आवाहन लोकमंगल बँकेच्या वतीने बँकेचे मुख्य कार्यकारी अधिकारी श्री राजेशसिंह बायस यांनी केले.
महिलांनी या संधीचा लाभ घेऊन स्वतःचा व्यवसाय सुरू करावा आणि आर्थिकदृष्ट्या सक्षम व्हावे, असे आवाहन लोकमंगल परिवार व पर्यटन संचालनालयाच्या वतीने करण्यात आले आहे.
