MH13NEWS network
सोलापूर / प्रतिनिधी
सोलापुरातील भारतीय सेनेतील माजी सैनिक तसेच श्री सिद्धेश्वर साखर कारखान्याचे माजी सुरक्षा अधिकारी श्रीशैल वाले (वय ७९, रा. दत्तनगर, कुमठेकर हॉस्पिटलजवळ, जुळे सोलापूर) यांचे रविवारी (२२ मार्च) सकाळी १०.२० वाजता अपघाती निधन झाले.
१८ मार्च रोजी सकाळी सुमारे सव्वा अकराच्या सुमारास सैफुल परिसरात रस्ता ओलांडत असताना भरधाव वेगाने येणाऱ्या दुचाकीने त्यांना पाठीमागून जोरदार धडक दिली होती. या अपघातात त्यांच्या डोक्याला गंभीर मार लागून मोठ्या प्रमाणात रक्तस्त्राव झाला. तसेच मान, पाय व शरीराच्या इतर भागांनाही गंभीर दुखापत झाली होती. तातडीने त्यांना बेशुद्धावस्थेत सैफुल येथील खासगी रुग्णालयात दाखल करण्यात आले; मात्र उपचारादरम्यान त्यांची प्राणज्योत मालवली.
भरधाव वेगाच्या मोटरसायकल स्वाराच्या चुकीमुळे
कुटुंब वत्सल वृद्धाचा मृत्यू झाल्याने परिसरात मोठी हळहळ व्यक्त केली जात आहे. संबंधित प्रकरणी पोलीस तपास सुरू असल्याची माहिती नातेवाईकांनी दिली.
त्यांच्या पार्थिवावर रविवारी दुपारी २ वाजता रूपाभवानी मंदिराजवळील लिंगायत स्मशानभूमीत अंत्यसंस्कार करण्यात आले. यावेळी विविध समाजघटकांतील नागरिक मोठ्या संख्येने उपस्थित होते.
श्रीशैल वाले हे माजी सैनिक असून कणखर, शिस्तप्रिय आणि आध्यात्मिक वृत्तीचे व्यक्तिमत्व म्हणून ओळखले जात.
त्यांच्या पश्चात दोन मुले, एक मुलगी, जावई, सून व नातवंडे असा परिवार आहे. रामकृष्ण आय हॉस्पिटलचे डॉ. उमा पवार (वाले ) यांचे ते वडील होत.
