वादळातही डगमगणार नाही; मनोज जरांगे पाटलांच्या दसरा मेळाव्यासाठी सोलापूरच्या सकल मराठा समाजाचे आवाहन
चलो नारायणगड’; २० ऑक्टोबरला मेळाव्यासाठी उपस्थित राहण्याचे आवाहन
सोलापूर : प्रतिनिधी
मराठा आरक्षण आंदोलनाचे नेते मनोज जरांगे पाटील यांच्या नारायणगडावरील दसरा मेळाव्यासाठी सोलापूरच्या सकल मराठा समाजाने समाजबांधवांना उपस्थित राहण्याचे आवाहन केले आहे. मंगळवार, २० ऑक्टोबर रोजी दुपारी १२ वाजता हा मेळावा होणार असून, ‘चलो नारायणगड’ असा संदेश देत समाजबांधवांनी मोठ्या संख्येने सहभागी व्हावे, असे आवाहन करण्यात आले आहे.
या मेळाव्याच्या पार्श्वभूमीवर सकल मराठा समाज, सोलापूर यांच्या वतीने प्रसिद्ध करण्यात आलेल्या आवाहनात आरोप आणि अफवांवर भाष्य करण्यात आले आहे. ‘आरोपांच्या वादळातही डगमगणार नाही, कारण विश्वास आहे स्वतःच्या चारित्र्यावर,’ असा ठाम संदेश या आवाहनातून देण्यात आला आहे.‘आरोप करणारे हजार भेटतील, अफवा पसरवणारेही कमी नाहीत; मात्र सत्याला पुराव्याची आणि चारित्र्याला स्वच्छतेची ताकद असते. माणसाची खरी ओळख त्याच्यावर होणाऱ्या आरोपांनी नव्हे, तर त्याच्या कर्तृत्वाने ठरते,’ असे आवाहनात नमूद करण्यात आले आहे.
मनोजदादा जरांगे पाटील यांचा सांगावा आल्याचे सांगत मराठा समाजबांधवांनी नारायणगडावरील दसरा मेळाव्यासाठी एकत्र यावे, असे आवाहन सकल मराठा समाज, सोलापूर यांच्या वतीने करण्यात आले आहे. ‘लढेंगे, जितेंगे, हम सब जरांगे’ असा निर्धारही या संदेशातून व्यक्त करण्यात आला आहे.
