MH 13 News Network
राष्ट्रवादी काँग्रेस शरद पवार पक्षाचे सर्वेसर्वा शरद पवार हे रविवारी पक्षाच्या मेळाव्यासाठी सोलापुरात आले असताना एका ठिकाणी मराठा आंदोलकांनी त्यांच्या गाडीचा ताफा अडवून मराठा आरक्षण आंदोलनाबद्दल भूमिका स्पष्ट करण्याचे आवाहन करून जाब विचारला.
पवार हे पक्षाच्या कार्यक्रमानिमित्त बार्शीकडे जात असताना वाटेत कुर्डूवाडीजवळ मराठा आरक्षण आंदोलकांनी त्यांची मोटार अडवून मराठा आरक्षणाच्या प्रश्नावर त्यांना भूमिका स्पष्ट करण्याची मागणी केली. पवार यांनी मराठा आरक्षण आंदोलकांशी संवाद साधला. मात्र त्यातून आंदोलकांचे समाधान झाले नाही.
राज्यात मराठा आरक्षण आंदोलन पेटलेले असून मराठा योद्धा मनोज जरांगे पाटील यांच्या शांतता रॅलीस आणि जाहीर सभेस प्रचंड मोठा प्रतिसाद मिळत आहे. त्यामुळे सत्ताधारी आणि विरोधकांचे धाबे दणाणले आहे.
याच पार्श्वभूमीवर सोलापुरात मनोज जरांगे पाटील यांनी उपस्थित जनसमुदायाला सांगा..! सगळ्यांना एकदा पाडायचे का..? असे विचारल्यावर खूप मोठा प्रतिसाद जनतेमधून समोर आला. ही बातमी वाऱ्यासारखी पसरल्यानंतर सत्ताधारी आणि विरोधकांना विधानसभा निवडणुकीच्या पार्श्वभूमीवर टेन्शन आले आहे.
धाराशिव मध्ये मराठा आंदोलकांनी राज ठाकरे यांना जाब विचारला. त्यानंतर आज रविवारी शरद पवार यांना मराठा आंदोलकांनी गाडी अडवून मराठा आरक्षण बाबत आपली भूमिका स्पष्ट करा असे म्हणत घोषणाबाजी केली.
पवार हे कुर्डूवाडीमार्गे बार्शीकडे जाताना वाटेत मराठा आरक्षण आंदोलकांनी त्यांची मोटार अडविली आणि मराठा आरक्षणाबद्दल भूमिका विचारली. त्यावेळी पवार यांनी मोटारीच्या दरवाजाची काच खाली करून आंदोलकांच्या भावना समजून घेतल्या.
मराठा आरक्षणाला आपला पूर्वीपासूनच पाठिंबा असल्याचे त्यांनी स्पष्ट केले. परंतु समाधान न झालेल्या मराठा आंदोलकांनी, तुम्ही मराठा आरक्षणाला फक्त पाठिंबा देता, त्यावर प्रत्यक्ष सक्रिय भूमिका का घेत नाही.?असा सवाल केला. यावेळी मराठा आंदोलकांनी मराठा आरक्षणाच्या घोषणा दिल्या.
यावरून जरांगे पाटील यांना पाठिंबा देणारा मराठा आंदोलक हे कोणत्या एका पक्षाला बांधील नसून सर्वच नेतेमंडळींना भूमिका स्पष्ट करण्याचे आवाहन करत असल्याचे दिसून येत आहे.
