‘श्री सद्गुरू प्रभाकर स्वामी महाराज की जय’ चा घुमला गजर
गुलाल कार्यक्रमास जमली भाविकांची मांदियाळी
सोलापूर : प्रतिनिधी
अत्यंत भक्तिमय वातावरणात ‘श्री सद्गुरू प्रभाकर स्वामी महाराज की जय’ चा गजर घुमला. रविवारी श्री सद्गुरू प्रभाकर स्वामी महाराज पुण्यतिथीनिमित्त भाविकांच्या मोठ्या उपस्थितीत गुलाल कार्यक्रम झाला.
श्री सद्गुरू प्रभाकर स्वामी महाराज यांच्या पुण्यतिथी महोत्सवानिमित्त रविवारी सकाळी श्री सद्गुरू प्रभाकर स्वामी महाराजांच्या समाधीवर मंदिराचे उपाध्ये दिगंबर जोशी गुरुजी यांच्या पौरोहित्याखाली उदय वैद्य यांच्या हस्ते संकल्प अभिषेक करण्यात आला. यानंतर तर्पणविधी संपन्न झाला. त्याचबरोबर मीनाताई जोशी यांच्या अधिपत्याखाली श्री गुरुगीता पारायणाची समाप्तीही झाली.
तसेच रविवारी सायंकाळी पं. दीपक कलढोणे यांचा भजनसेवेचा कार्यक्रम झाला. प्रकाश कोथिंबीरे व दत्तात्रय कुसेकर यांच्या अधिपत्याखाली रात्री सांप्रदायिक भजन झाले. यानंतर रात्री १०.४५ वाजता भक्तिमय वातावरणात गुलालाचा कार्यक्रम करण्यात आला.
यावेळी श्री सद्गुरू प्रभाकर स्वामी महाराज मंदिर ट्रस्टचे चीफ ट्रस्टी दत्तात्रय देशमुख, मॅनेजिंग ट्रस्टी बाळकृष्ण शिंगाडे, ट्रस्टी उदय वैद्य, वसंत बंडगर, ट्रस्टी सदस्य वामन वाघचौरे, मोहन बोड्डू, रवी गुंड, सुभाष बद्दूरकर, प्रकाश कोथिंबीर दत्तात्रय कुसेकर, व्यवस्थापक निरंजन दंतकाळे, परशुराम होटकर, प्रमोद महिंद्रकर, राहुल नल्ला, अमर पाटील आदी उपस्थित होते.
उद्या सोमवारी लाडू प्रसाद वाटप
आज सोमवारी (दि. २६) रोजी दुपारी १२ वाजता हजारो भाविकांना लाडू प्रसादाचे वाटप पोलीस उपायुक्त (परिमंडळ) विजय कबाडे त्यांच्या हस्ते होणार आहे. यावेळी भाविकांनी उपस्थित रहावे, असे आवाहन श्री सद्गुरू प्रभाकर स्वामी महाराज मंदिर ट्रस्टतर्फे करण्यात आले आहे.
गुरुमहाराजांचे आजचे दिव्य दर्शन..!
