MH 13 News network
सोलापूर शहराचे प्रवेशद्वार असलेल्या छत्रपती संभाजी महाराज चौक या ठिकाणी महापालिकेच्या आणि शासनाच्या वतीने छत्रपती संभाजी महाराज पुतळा परिसरात सुशोभीकरण करण्यात आलेले आहे. परंतु ते तकलादू पद्धतीचे झाले असल्याची माहिती सामाजिक कार्यकर्ते ॲड.योगेश पवार यांनी महापालिका आयुक्तांनी बोलवलेल्या बैठकीत देताच आयुक्तांनी या परिसराचे थर्ड पार्टी ऑडिटिंग करण्याचे आदेश दिले आहेत.
छत्रपती शिवाजी महाराज पुतळा परिसराचे सुशोभीकरण करण्याचे काम काही महिन्यापासून प्रलंबित आहे. यामुळे शिवभक्तांच्या भावना या संतप्त झाल्या आहेत. त्यासोबत छत्रपती संभाजी महाराज चौकातील सुशोभीकरण हे दर्जाहीन असल्याचे अनेक शिवभक्तांचे म्हणणे होते.
याबाबत भावना जाणून घेण्यासाठी महापालिका आयुक्तांनी नगर अभियंता सारिका अकुलवार यांच्या माध्यमातून शिवजन्मोत्सव मध्यवर्ती महामंडळाची या पदाधिकाऱ्यांसोबत बैठक आयोजित केली होती.
या बैठकीस महापालिका आयुक्त डॉ. सचिन ओम्बासे, अतिरिक्त आयुक्त रवी पवार, संदीप कारंजे, सहाय्यक आयुक्त आशिष लोकरे, यांच्यासह संबंधित खात्याचे वरिष्ठ अधिकारी, झोन विभागाचे अधिकारी उपस्थित होते.
बैठकीच्या सुरुवातीला छत्रपती शिवाजी महाराज चौकातील पुतळ्याचे काम अतिशय संथ गतीने असल्याचे मनपाच्या निदर्शनाला आले असून त्याचे नेमके काम कशामुळे रेंगाळले..? याची माहिती प्रोजेक्टरवर मध्यवर्तीच्या पदाधिकाऱ्यांना आणि कार्यकर्त्यांना देण्यात आली.
छत्रपती शिवरायांच्या अश्वारूढ पुतळ्याला कोणताही डिफेक्ट नाही. याची माहिती देताना सर्व प्रकारच्या तांत्रिक चाचण्या केल्या असल्याचे सांगण्यात आले. चबुतराच्या स्लॅब बाबत दुरुस्ती करण्याचे काम वेगाने हाती घेण्यात येणार असल्याचे सांगितले.
सोमवारी 28 एप्रिल रोजी दुपारी या बैठकीचे आयोजन करण्यात आले होते. यावेळी मध्यवर्तीच्या पदाधिकाऱ्यांनी या संदर्भात सविस्तर माहिती घेऊन प्रतिक्रिया व्यक्त केली.
दरम्यान, मध्यवर्ती महामंडळाचे पुरुषोत्तम बरडे यांनी छत्रपती संभाजी महाराज चौकात अतिशय तकलादु पद्धतीचे,निकृष्ट दर्जाचे काम झाले असल्याचे निदर्शनाला आणले. बांबूच्या कामट्या, बंद असणारे कारंजे, एनकॅपद्वारे केलेले पर्यावरणाशी निगडित असणारे सुशोभीकरण, या ठिकाणी लावण्यात आलेली पामची झाडे, विद्युत रोषणाई, आणि या जवळ करण्यात आलेले वरून पाण्याचा झोत टाकणारे कारंजे यावर ताशेरे ओढले.
छावा संघटनेचे नेते, ॲड. योगेश पवार यांनी महापालिका आयुक्तांनी आमच्या भावना जाणून घेतल्याबद्दल आभार मानले. त्याचसोबत छत्रपती संभाजी महाराज चौकातील पुतळा परिसरातील सुशोभीकरण बाबत प्रश्नचिन्ह निर्माण केले. भविष्यात या ठिकाणी पडझड होऊ शकते. याला जबाबदार कोण..? येथील असणारे स्मारक हे कोणा एकाची जहागिरी नाही. प्रशासनाने तातडीने पावले उचलावी. अन्यथा भविष्यात शिवभक्तांचा मोठा रोष प्रशासनाला भोगावा लागेल असेही त्यांनी सांगितले.
यावर तातडीने महापालिका आयुक्तांनी संबंधित खात्याच्या अधिकाऱ्यांना छत्रपती संभाजी महाराज पुतळा परिसरातील सुशोभीकरणाचे थर्ड पार्टी ऑडिटिंग करण्याच्या सूचना दिल्या.
छत्रपती संभाजी महाराजांच्या जयंती नंतर म्हणजेच 14 मे नंतर या संदर्भात पुढील सर्व उपाययोजना करण्यात येणार असल्याचे त्यांनी सांगितले.
या ठिकाणी प्रत्यक्ष भेट देऊन या भागातील कामाची माहिती घेणार असल्याचे आश्वासन सर्व पदाधिकाऱ्यांना दिले.
यावेळी शिवजन्मोत्सव मध्यवर्ती महामंडळाचे माजी उपमहापौर पद्माकर काळे, पुरुषोत्तम बरडे, राजन जाधव, श्रीकांत घाडगे, माऊली पवार, रवी मोहिते, माजी नगरसेवक अनंत जाधव, माजी अध्यक्ष पवार, उत्सवा अध्यक्ष सुशील बंदपट्टे, रवी मोहिते, सोमनाथ राऊत, दिनकर जगदाळे, प्रताप चव्हाण,मतीन बागवान,प्रकाश ननवरे, पुकाळे, शेखर फंड यांच्यासह पदाधिकारी कार्यकर्ते,शिवभक्त मोठ्या संख्येने उपस्थित होते.
