“त्या” मूर्तिकार खून प्रकरणात सहा जणांची निर्दोष मुक्तता

MH13NEWS network

सोलापूर, दि. — विनायक उर्फ हर्षल बाळकृष्ण बोझा (वय ३२, रा. नवीन विडी घरकुल) यांच्या खूनप्रकरणी दाखल खटल्यात प्रमुख जिल्हा व सत्र न्यायाधीश मनोज शर्मा यांनी पुराव्याअभावी सर्व सहा आरोपींची निर्दोष मुक्तता केली.

या प्रकरणात मूर्तिकार १) नागेश दत्तात्रय लगशेट्टी (वय ४६), २) भूपती उर्फ गोट्या अरुण नारा (वय २४), ३) रमेश उर्फ शाम मल्लेश्याम गुंतुक (वय २४), ४) अमोल दिगंबर संदूपटला (वय २४), ५) गणेश काशिनाथ गडगी आणि ६) संतोष उर्फ सनी श्रीनिवास मरगम (सर्व रा. विडी घरकुल, सोलापूर) यांच्यावर खटला चालविण्यात आला होता.

प्रकरणाची पार्श्वभूमी..

नागेश लगशेट्टी हे गणेश मूर्तीचे व्यापारी असून, मयत विनायक हे मूर्तीचे साचे बनविण्याचे काम करत होते. हातउसने दिलेल्या पैशांवरून वाद निर्माण झाल्याचा आरोप होता. २० एप्रिल २०२४ रोजी विनायक हे गाडीवरून घरी जात असताना स्वराज्य तरुण मित्र मंडळाजवळील मैदानात त्यांना अडवून धारदार शस्त्राने वार केल्याचा आरोप करण्यात आला होता. त्यानंतर त्यांना क्रांती चौक भाजी मंडई परिसरात रस्त्यावर टाकून डोक्यावर सिमेंटचा ठोकळा मारून खून केल्याची फिर्याद मयताची आई राधाबाई बाळकृष्ण बोझा यांनी वळसंग पोलीस ठाण्यात दिली होती.
पोलिसांनी तपास करून आरोपींविरुद्ध दोषारोपपत्र दाखल केले होते.

न्यायालयीन निर्णय..

सुनावणीदरम्यान बचाव पक्षाचे ॲड. मिलिंद थोबडे यांनी प्रत्यक्षदर्शी साक्षीदार नसल्याचा तसेच कट रचल्याचे ठोस पुरावे सरकारी पक्ष सादर करू शकला नसल्याचा युक्तिवाद केला. त्यानंतर न्यायालयाने सर्व आरोपींना निर्दोष मुक्त केले.

या खटल्यात आरोपींतर्फे ॲड. मिलिंद थोबडे, ॲड. मनोज पामुल, ॲड. विनोद सूर्यवंशी यांनी काम पाहिले, तर सरकारतर्फे ॲड. आनंद कुर्डूकर यांनी बाजू मांडली.