“सोलापूरमध्ये उभारी घेतंय खेळाचं वादळ!”

MH 13 NEWS NETWORK

सोलापुरात क्रीडा प्रशिक्षण शिबिरास उत्साहात सुरुवात

सोलापूर: जिल्हा क्रीडा अधिकारी कार्यालय, ॲथलेटिक्स असोसिएशन सोलापूर व सोलापूर शहर-जिल्हा क्रीडा व शारीरिक शिक्षण शिक्षक महासंघ यांच्या संयुक्त विद्यमाने दिनांक 5 मे ते 20 मे 2025 दरम्यान सोलापूर शहर पोलीस मुख्यालयाच्या मैदानावर मैदानी क्रीडा प्रशिक्षण शिबिरास सुरुवात झाली आहे.

या शिबिरात ज.रा. चंडक प्रशाला बाळे, दयानंद काशिनाथ असावा प्रशाला, सहस्रार्जुन प्रशाला, वालचंद महाविद्यालय, हरीभाई देवकर प्रशाला, नेताजी प्रशाला, बटर फ्लाय इंग्लिश मीडियम स्कूल आदी शाळा आणि कनिष्ठ महाविद्यालयातील विद्यार्थ्यांनी उत्स्फूर्त प्रतिसाद दिला आहे.

शिबिराच्या दुसऱ्या दिवशी जिल्हा क्रीडा अधिकारी श्री. नरेंद्र पवार यांनी अचानक भेट देऊन विद्यार्थ्यांशी संवाद साधला. त्यांनी विद्यार्थ्यांना बालवयातच खेळाकडे वळण्याचे महत्त्व पटवून दिले. आत्मविश्वास, जिद्द, चिकाटी व सुदृढ आरोग्यासाठी खेळाची भूमिका महत्वाची असल्याचे ते म्हणाले.

प्रमुख प्रशिक्षक म्हणून जिल्हाध्यक्ष श्री. दशरथ गुरव, राष्ट्रीय खेळाडू श्रीरंग खांडेकर, प्रशिक्षक श्री. उज्वल मलजी, पोलीस हवालदार श्री. माळी, राष्ट्रीय कोच संकेत ढोले व शिवराज पाटील यांची उपस्थिती लाभली.

विद्यार्थ्यांच्या सहभागाने शिबिराला उत्साहाचे वातावरण लाभले असून, क्रीडा अधिकारी कार्यालयाने यासाठी समाधान व्यक्त केले आहे.