सोलापुरातील क्रोमा शोरूम चोरी प्रकरण उघडकीस; आंतरराज्यीय सराईत गुन्हेगार अटकेत
सोलापूर, दि. ४ जून २०२५ – सोलापुरातील होटगी रोडवरील टाटा कंपनीच्या क्रोमा शोरूममध्ये चोरी करून तब्बल ४० लाख रुपयांच्या मोबाईल फोनसह मुद्देमाल लंपास करणाऱ्या आंतरराज्यीय सराईत गुन्हेगारास सोलापूर गुन्हे शाखेच्या पथकाने अटक केली आहे.
आरोपीकडून ३६,३३,८२९ रुपयांचे ६७ महागडे मोबाईल हस्तगत करण्यात आले आहेत.दिनांक ३० मे २०२५ रोजी रात्री, टाटा क्रोमा शोरूम फोडून अज्ञात चोरट्याने अॅपल, सॅमसंग, वनप्लस, ओप्पो, विवो व नथिंग या कंपन्यांचे एकूण ७८ मोबाईल फोन व क्रोमा शोरूमची काळ्या रंगाची बॅग असा एकूण ४०,४१,२२० रुपयांचा मुद्देमाल चोरी केला होता.
यासंदर्भात शोरूमचे मॅनेजर जितेंद्र दिलीप वाणी यांनी विजापूर नाका पोलीस ठाण्यात गुन्हा नोंदवला होता.गुन्ह्याच्या तपासासाठी गुन्हे शाखेचे वरिष्ठ पोलीस निरीक्षक श्री. सुनिल दोरगे, स.पो.नि. शैलेश खेडकर यांच्या नेतृत्वाखालील पथकाने घटनास्थळी तपास सुरू केला.
सीसीटीव्ही फुटेजच्या मदतीने व तांत्रिक माहितीच्या आधारे पथकास एका संशयितावर लक्ष केंद्रीत करता आले.
पुढील तपासात तो रामनिवास उर्फ रामा मंजू गुप्ता (वय ३७, रा. दिवा, ठाणे) असल्याचे निष्पन्न झाले, जो एक आंतरराज्यीय गुन्हेगार असून त्याच्यावर गुजरात, मध्यप्रदेश, कर्नाटक, गोवा आणि महाराष्ट्र राज्यांत घरफोडी व मोबाईल शॉपी फोडण्याचे गुन्हे दाखल आहेत.
दिनांक ३ जून २०२५ रोजी सोलापूर रेल्वे स्थानक परिसरात संशयितरित्या फिरत असताना रामनिवास गुप्ताला गुन्हे शाखेच्या पथकाने ताब्यात घेतले. त्याच्याकडून ६७ महागडे मोबाईल फोन, एक काळी पिशवी व त्याचा वापरात असलेला मोबाईल असा एकूण रु. ३६,३३,८२९ किमतीचा मुद्देमाल हस्तगत करण्यात आला.
चौकशीत त्याने गुन्ह्याची कबुली दिली आहे.
ही उल्लेखनीय कारवाई पोलीस आयुक्त एम. राजकुमार, उपआयुक्त डॉ. दीपाली काळे, सहा. आयुक्त राजन माने यांच्या मार्गदर्शनाखाली करण्यात आली. स.पो.नि. शैलेश खेडकर, सपोनि विजय पाटील व त्यांच्या पथकातील पोलीस अंमलदार संदीप जावळे, इम्रान जमादार, विनोद रजपूत, इब्राहीम शेख आदींनी अत्यंत कौशल्याने व झपाट्याने तपास करून गुन्हा उघडकीस आणला.
