आंबेडकरी चळवळीतील निष्ठावंत कार्यकर्त्याचा सन्मान अजरामर; सोहन लोंढे यांच्या आठवणींना उजाळा

MH 13 NEWS NETWORK

सोलापूर – (प्रतिनिधी)

वंचित बहुजन आघाडीचे माजी शहराध्यक्ष व आंबेडकरवादी युवा नेते दिवंगत सोहन लोंढे यांच्या निवासस्थानी बाळासाहेब आंबेडकर यांचे सुपुत्र सुजात आंबेडकर यांनी मंगळवारी सांत्वनपर भेट दिली. या भेटीदरम्यान सुजात आंबेडकर यांनी सोहन लोंढे यांच्या कार्याची आठवण करून देत त्यांना भावपूर्ण आदरांजली वाहिली.

सुजात आंबेडकर यांनी सोहन लोंढे यांच्या सामाजिक व राजकीय योगदानाचा विशेष उल्लेख करत, २०१९ च्या लोकसभा निवडणुकीतील त्यांच्या प्रभावी कामगिरीची आठवण करून दिली. तसेच विधानसभा निवडणुकीत स्वतः सोहन लोंढे यांनी उमेदवार उभा केल्याची बाब नमूद करत, ते कार्यकर्त्यांशी किती घट्ट नातं जपणारे होते, हे अधोरेखित केले. आपल्या संपर्कातील प्रत्येक कार्यकर्त्याबाबत सजग आणि संवेदनशील असलेला युवा नेता क्वचितच पाहायला मिळतो, असे उद्गार त्यांनी काढले.

या प्रसंगी उपस्थित कार्यकर्ते व कुटुंबीयांसाठी हा क्षण भावूक करणारा ठरला. एका खर्‍या आंबेडकरी कार्यकर्त्याला अपेक्षित असलेली निळी सलामी आणि बाबासाहेबांनी स्थापन केलेल्या समता सैनिक दलाची सलामी मिळणे हे प्रत्येकाच्या नशिबी नसते, असे सांगत सुजात आंबेडकर यांनी आंबेडकरी चळवळीत कार्य करणाऱ्या निष्ठावंत कार्यकर्त्यांचा सन्मान सदैव अजरामर राहतो, हे अधोरेखित केले.

आजचा हा प्रसंग आंबेडकरी चळवळीत कार्य करणाऱ्या कार्यकर्त्यांच्या सन्मानाचे जिवंत उदाहरण असल्याची भावना यावेळी उपस्थितांनी व्यक्त केली.