MH 13 News
१,६८८ मतदार ठरवणार नवी कार्यकारिणी; ४ ऑगस्टला मतदान, ५ ऑगस्टला निकाल
सोलापूर | प्रतिनिधी
सोलापूर बार असोसिएशनच्या सन २०२६-२०२७ च्या वार्षिक निवडणुकीत उमेदवारी अर्ज मागे घेण्याच्या अंतिम दिवशी एकाही उमेदवाराने माघार न घेतल्याने सर्वच प्रमुख पदांसाठी अटीतटीच्या लढती निश्चित झाल्या आहेत. त्यामुळे १,६८८ मतदार असलेल्या या प्रतिष्ठेच्या निवडणुकीत ४ ऑगस्ट रोजी रंगणाऱ्या मतदानाकडे संपूर्ण विधी क्षेत्राचे लक्ष लागले आहे.
अध्यक्षपदासाठी ॲड. संतोष पाटील, ॲड. एस. आर. रेशमे, ॲड. राजेंद्र फताटे आणि ॲड. मल्लिनाथ म्हमाणे यांच्यात प्रतिष्ठेची चौकोनी लढत होणार आहे. तर खजिनदारपदासाठी तब्बल पाच उमेदवार रिंगणात असल्याने सर्वाधिक चुरशीची पंचरंगी लढत याच पदासाठी पाहायला मिळणार आहे.
उपाध्यक्ष (खुला गट) पदासाठी ॲड. परमानंद जवळकोटे आणि ॲड. परवेज ढालायत यांच्यात थेट सामना होणार आहे. महिला राखीव उपाध्यक्षपदासाठी ॲड. शर्मिला देशमुख व ॲड. उर्मिला जहागीरदार आमनेसामने आहेत. सचिवपदासाठी ॲड. जयप्रकाश भंडारे आणि ॲड. मंजुनाथ कक्कलमेली यांच्यात लढत रंगणार आहे.
खजिनदारपदासाठी ॲड. सिद्धाराम पाटील, ॲड. संतोषकुमार बाराचारे, ॲड. अंजली बाबरे, ॲड. नरेंद्रकुमार गावडे आणि ॲड. मंगेश कंदलगावकर हे पाच उमेदवार रिंगणात आहेत.
सहसचिवपदासाठी ॲड. प्रियंका गोरंटी, ॲड. मेघना मलपद्दी आणि ॲड. आर. एल. लगशेट्टी (गोटीपामुल) यांच्यात तिरंगी लढत होणार आहे.
माघारीची मुदत संपताच न्यायालय परिसरात प्रचाराने वेग घेतला आहे.
विविध पॅनेल तसेच अपक्ष उमेदवारांनी मतदारांच्या प्रत्यक्ष भेटीगाठी, प्रचारपत्रकांचे वितरण आणि संपर्क मोहिमेला गती दिली असून निवडणुकीचे वातावरण चांगलेच तापले आहे.
दि. ४ ऑगस्ट २०२६ रोजी सकाळी ७.३० ते सायंकाळी ५.३० या वेळेत मतदान होणार असून सायंकाळी ६.०० वाजल्यापासून मतमोजणीला प्रारंभ होईल. दि. ५ ऑगस्ट रोजी विजयी उमेदवारांची अधिकृत घोषणा करून नव्या कार्यकारिणीचा पदभार सोहळा पार पडणार आहे.
संपूर्ण निवडणूक प्रक्रिया पारदर्शक व सुरळीत पार पाडण्यासाठी मुख्य निवडणूक निर्णय अधिकारी म्हणून ॲड. बाबासाहेब जाधव कार्यरत आहेत. त्यांना सहाय्यक निवडणूक निर्णय अधिकारी म्हणून ॲड. बसवराज हिंगमिरे, ॲड. अविनाश बिराजदार, ॲड. संजय पवार, ॲड. प्रवीण कुलकर्णी, ॲड. विकास कुलकर्णी आणि ॲड. शुभम माने हे सहकार्य करत आहेत.
