MH 13News Network
भाजपा प्रदेश कार्यकारिणी सदस्य शंकर वाघमारे यांनी काल दिनांक ८ एप्रिल रोजी मोहोळ येथील भाजपा कार्यकर्ता मेळाव्यात समाजात तेढ निर्माण करणारे वक्तव्य केल्याने त्यांच्यावर गुन्हा दाखल करून कठोर कारवाई करण्याचे निवेदन सकल मराठा समाज मोहोळ तालुक्याच्या वतीने देण्यात आले आहे.
याबाबत सविस्तर हकीकत अशी की..
भाजपा प्रदेश कार्यकारणी सदस्य शंकर वाघमारे यांनी 8 एप्रिल रोजी मोहोळ येथील भाजपा कार्यकर्ता मेळाव्यात बोलताना वडवळ येथील मराठा समाजातील आंदोलकांनी तमाशा केला.. अशा प्रकारची चित्रफीत मोठ्या प्रमाणावर समाज माध्यमांमध्ये व्हायरल होत असल्याचे निवेदनामध्ये नमूद केले आहे.
बेताल वक्तव्य करून आदर्श आचारसंहितेच्या काळामध्ये समाजामध्ये जातीय तेढ निर्माण करण्याचा प्रयत्न केला . या संदर्भातील चित्रफीत समाज माध्यमावर जोरदार व्हायरल होत असून त्यातून तेढ निर्माण होत असल्याचे निवेदन मोहोळ पोलीस स्टेशन येथील पोलीस निरीक्षकांना तसेच तहसीलदार यांना देण्यात आले आहे.
निवेदनावर संतोष गायकवाड, ॲड .श्रीरंग लाळे, बाळासाहेब ज्ञानदेव गायकवाड, डॉ.प्रमोद पाटील, सत्यवान देशमुख, संजय शिंदे ,अजित भोसले, श्रीनिवास माने ,नागेश भोसले, सोमनाथ दोडके, प्रकाश कोकाटे आधी समाज बांधवांच्या स्वाक्षऱ्या आहेत.
मराठा आरक्षणाचा लढा अजूनही मनोज जरांगे पाटील यांच्या नेतृत्वाखाली सुरू असून राज्य शासनाने मराठा समाजाची दहा टक्के आरक्षण देऊन फसवणूक केल्याचे मत मराठा समाज व्यक्त करत आहे. सोलापुरात विशेषतः मोहोळ तालुक्यातील मराठा समाज आरक्षण आंदोलनात सक्रिय असल्याचे चित्र स्पष्ट झालेले आहे.
