🔴 ब्रेकिंग न्यूज | मनपा आयुक्तांचा दणका! माजी महापौर सपाटेंसह निकाळजे, देशमुख, जानकर, धूम्मा यांना नोटिसा..

सपाटे, निकाळजे, देशमुख, जानकर, धूम्मा यांना नोटिसा —

अंवतीनगर, यशनगर परिसरातील नाल्यांवरील अतिक्रमणावर मनपा प्रशासनाचा कठोर विळखा!

सोलापूर – शहरातील नालेसफाई आणि प्रवाही जलनिस्सारण व्यवस्थेसाठी सोलापूर महानगरपालिकेने मोठी कारवाई सुरू केली आहे. आज मनपा आयुक्त डॉ. सचिन ओम्बासे यांनी अंवतीनगर व यशनगर परिसरातील सहा कमान आणि चौदा कमान नाल्यांची प्रत्यक्ष पाहणी करत सुरू असलेल्या कामांचा आढावा घेतला

.या पाहणीत नाल्याचा प्रवाह रोखणाऱ्या अतिक्रमणांची दखल घेत, उत्तमराव निकाळजे, गंगाई सपाटे, मनोहर सपाटे, सुधीर देशमुख, विजय जानकर, शिवानंद धूम्मा यांच्यासह एकूण १७ नागरिकांना नोटिसा बजावण्यात आल्या आहेत.

आयुक्तांनी स्पष्ट निर्देश दिले की नाल्याचे रुंदीकरण आणि खोलीकरण तातडीने पूर्ण करण्यात यावे.

यासाठी प्रशासनाने आजपासूनच मोठी यंत्रसामग्री तैनात केली आहे

३ पोकलेन, ४ जेसीबी आणि ६ डंपर यांची नेमणूक करून कामांना वेग देण्यात आला आहे.

या कारवाईदरम्यान २५ पोलीस कर्मचारी, ४० अधिकारी आणि मनपा कर्मचाऱ्यांचा मोठा फौजफाटा उपस्थित होता.

आयुक्त ओम्बासे यांनी पाहणीदरम्यान स्पष्ट इशारा..

“नाल्यावर अतिक्रमण करणाऱ्यांविरुद्ध कठोर कारवाई केली जाईल. नाल्याचा प्रवाह रोखणारी कोणतीही कृती सहन केली जाणार नाही.

”महापालिकेने नागरिकांना स्वच्छ, प्रवाही आणि अडथळेमुक्त नाला व्यवस्थापनासाठी सहकार्य करण्याचे आवाहन केले आहे.

या कारवाईनंतर संबंधित भागातील नागरिकांमध्ये चर्चेला उधाण आले असून, मनपाच्या या निर्णयाचे अनेकांनी स्वागत केले आहे.

नुकत्याच पडलेल्या पावसामुळे, तसेच नाला आणि अदिला नदी या ठिकाणी सोडलेल्या प्रचंड पाण्याच्या प्रवाहामुळे याच भागातील जनजीवन अक्षरशः विस्कळीत झाले होते.

“पाण्याचे नगर” अशी ओळख निर्माण होते की काय अशी परिस्थिती निर्माण झाली होती. येथील अनेक जण रहिवासी या ठिकाणाहून निघून आपल्या नातेवाईकांकडे आणि पाहुण्यांकडे गेले. या भागातील आमदार विजयकुमार देशमुख यांच्यासह महापालिका आयुक्त आणि त्यांच्या सर्व टीमने प्रत्यक्ष जागी जाऊन परिस्थितीचा आढावा घेतला. त्याचसोबत तातडीने आपत्कालीन यंत्रणा राबवली. यामुळे येथील परिस्थिती हाताबाहेर गेली नाही.

महापालिका आयुक्त इतक्यावरच थांबले नाहीत तर त्यांनी भविष्यामध्ये अशी परिस्थिती निर्माण होऊ नये यासाठी प्रशासनाच्या वारंवार बैठका घेतल्या. पालकमंत्र्यांसह जिल्हाधिकारी आणि लोकप्रतिनिधी यांच्याशी झालेल्या चर्चेनंतर त्यांनी पावसाळा संपताच ॲक्शन मोडवर येऊन नाल्यावरील अतिक्रमण करणाऱ्यांना लगाम घालण्यास सुरुवात केल्याने या भागातील नागरिकांनी आणि सोलापूरकरांनी महापालिका आयुक्तांवर कौतुकाचा वर्षाव केला आहे.