MH13News network
आमदार देवेंद्र कोठे यांच्या प्रयत्नांना यश – सोलापूर सिव्हिलसाठी नवे एमआरआय मशीन मंजूर!
सोलापूर: छत्रपती शिवाजी महाराज सर्वोपचार रुग्णालय (सिव्हिल हॉस्पिटल) येथे नव्या एमआरआय मशीनच्या मंजुरीचा मार्ग मोकळा झाला आहे. येथे सध्या कार्यान्वित असलेली मशीन साधारण बारा वर्षे जुनी असून कालबाह्य झालेली ही मशीन वारंवार दुरुस्त करून वापरण्याचा प्रयत्न होतो. मात्र गेल्या काही दिवसांपासून येथील एमआरआय मशीन बंद असल्याने सोलापूर जिल्ह्यासह शेजारील कर्नाटक व तेलंगणातील हजारो रुग्णांना मोठ्या अडचणींना सामोरे जावे लागत होते. बाहेर खासगी रुग्णालयात महागडे एमआरआय स्कॅन करून आणण्याशिवाय रुग्णांना पर्याय नव्हता. सोलापूरकरांसाठी जनसेवेलाच देव यज्ञ मानून नूतन आमदार देवेंद्र कोठे हे प्रयत्नशील आहेत. आजच्या पुणे येथील राज्यस्तरीय नियोजन समितीच्या बैठकीत उपमुख्यमंत्री अजित पवार यांच्याकडे रुग्णांसाठी शब्द टाकून तातडीने सिविल हॉस्पिटल साठी एमआरआय मशीन मंजूर करून घेतले.
सोलापूर शहर मध्यचे आमदार देवेंद्र कोठे यांनी राज्यस्तरीय नियोजन समितीच्या बैठकीत या प्रश्नावर ठोस भूमिका घेत सोलापूरच्या सिव्हिलसाठी नवे एमआरआय मशीन मंजूर करून घेतले.
राज्याचे उपमुख्यमंत्री तथा वित्त व नियोजन मंत्री अजित पवार यांच्या प्रमुख उपस्थितीत पुणे विभागीय आयुक्त कार्यालयात झालेल्या या बैठकीत आमदार कोठे यांनी सोलापूरच्या रुग्णांसाठी एमआरआय मशीनची तातडीची गरज असल्याचे स्पष्ट केले.
सोलापूरच्या सिव्हिलमध्ये नव्या तंत्रासह एमआरआय यंत्रणा उपलब्ध झाल्यास गोरगरीब रुग्णांना दिलासा मिळणार असल्याची बाब अधिष्ठाता डॉ. संजीव ठाकूर यांनीही बैठकीत मांडली. आमदार कोठे व अधिष्ठाता यांच्याशी झालेल्या चर्चेनंतर उपमुख्यमंत्री अजित पवार यांनी संबंधित विभागाच्या सचिवांना त्वरित निधी मंजूर करण्याचे आदेश दिले.
सदर बैठकीला ग्रामविकास मंत्री व सोलापूरचे पालकमंत्री जयकुमार गोरे, जिल्हाधिकारी कुमार आशीर्वाद, महापालिका आयुक्त शितल तेली-उगले यांच्यासह समितीचे अन्य सदस्य आणि विविध विभागांचे वरिष्ठ अधिकारी उपस्थित होते.सोलापुरातील आरोग्य सुविधांसाठी ही मोठी उपलब्धी मानली जात आहे. नवीन एमआरआय मशीन लवकरच कार्यान्वित होणार असून, त्यामुळे गरीब आणि गरजू रुग्णांना मोठा दिलासा मिळणार आहे.
हा माझ्यासाठी आशीर्वादच..!
सोलापूरकरांसाठी तसेच तालुका आणि परराज्यातील रुग्णांसाठी एक महत्त्वाची गरज पूर्ण झाली आहे.छत्रपती शिवाजी महाराज सर्वोपचार रुग्णालय म्हणजेच सिव्हिल हॉस्पिटलमध्ये परराज्यातील अनेक रुग्ण येतात. एम आर आय तपासणी महत्त्वाची असून अनेक वर्षापासूनची ही मागणी होती. यासाठी पालकमंत्री जयकुमार गोरे, जिल्हाधिकारी कुमार आशीर्वाद, अधिष्ठाता डॉ. संजीव ठाकूर यांच्याशी वेळोवेळी चर्चा झाली होती. सोलापूरातल्या बैठकीत हा मुद्दा महत्त्वाचा ठरला होता. आज उपमुख्यमंत्री अजितदादा यांच्याशी एम आर आय बाबत चर्चा झाली आणि त्यांनी तात्काळ आदेश दिले. या महागड्या मशीन मधून खाजगी रुग्णालयातून तपासणी करणे सर्वसामान्य रुग्णांना परवडणारे नाही. रुग्णांच्या, त्यांच्या नातेवाईकांच्या आशीर्वादामुळेच या प्रयत्नांना यश आले आहे.
श्री.देवेंद्र कोठे,आमदार
