MH13NEWS Network
सोलापूर | प्रतिनिधी
दुबईमध्ये प्रसिद्ध असलेल्या अल अदील ट्रेडिंगचे चेअरमन धनंजय दातार यांनी सोलापुरातील पारंपरिक आणि दर्जेदार कृषी उत्पादनांची खरेदी करण्यास तयारी दर्शवली आहे.
आमदार सुभाष देशमुख यांच्या नेतृत्वाखाली सोलापूर येथील उच्चस्तरीय व्यावसायिक शिष्टमंडळाने नुकतीच दुबई भेट दिली. यावेळी झालेल्या भेटीत सोलापूरच्या विविध उत्पादनांचे सादरीकरण करण्यात आले.
या शिष्टमंडळाने सोलापूरची प्रसिद्ध शेंगाचटणी, ज्वारीची कडक भाकरी, ज्वारी, डाळी, तांदूळ यासह इतर विविध खाद्य व कृषी उत्पादने सादर केली.
यासोबतच सोलापूरच्या बॅग उद्योग क्षेत्रातील नावीन्यपूर्ण पॅकेजिंग सोल्यूशन्सचेही प्रात्यक्षिक सादर करण्यात आले. दातार यांनी या उत्पादनांच्या गुणवत्ता व पारंपरिकतेचे विशेष कौतुक केले आणि त्यांच्या खरेदी व्यवस्थापन टीमसोबत चर्चा करून काही उत्पादनांची खरेदी करण्याची तयारी दर्शवली.
या भेटीत त्यांनी सोलापूरच्या सांस्कृतिक वारशाचे आणि उद्योजकीय क्षमतेचे कौतुक करत पूर्वीच्या सोलापूर भेटीच्या आठवणींना उजाळा दिला. ही भेट सोलापूरच्या स्थानिक उद्योजकांसाठी एक नवी निर्यात संधी ठरली असून भारत-यूएई व्यापारसंबंध अधिक दृढ होणार आहेत
.या शिष्टमंडळात आ. सुभाष देशमुख यांच्यासह सोलापूर गारमेंट्स मॅन्युफॅक्चरर्स असोसिएशनचे संचालक अमित जैन, उद्य्यम पीएएचएसयूआय फाउंडेशनचे सीईओ डॉ. राजेश गुराणी, अल्पेश संकलेचा, विजय पाटील, यश जैन, प्रदीप जैन, आनंद झाड आणि चंद्रशेखर जाधव यांचा समावेश होता.
