मराठी चित्रपटसृष्टीत एक वेगळीच भावना आणि आशय घेऊन येणाऱ्या ‘सजना’ या चित्रपटाचा बहुप्रतिक्षित ट्रेलर नुकताच प्रदर्शित झाला असून, त्याने प्रेक्षकांमध्ये प्रचंड उत्सुकता निर्माण केली आहे.
शशिकांत धोत्रे निर्मित आणि दिग्दर्शित ‘सजना’ या चित्रपटाच्या ट्रेलरचे विशेष वैशिष्ट्य म्हणजे तो केवळ सोशल मीडियावर प्रकाशित न होता, तर मराठीतील अनेक प्रमुख डिजिटल एंटरटेनमेंट प्लॅटफॉर्मवर थेट लाईव्ह स्ट्रीम करण्यात आला. यामुळे हा ट्रेलर लाँच एक संस्मरणीय प्रसंग ठरला.
ट्रेलरमध्ये दिसतो एक भावनांनी भरलेला प्रवास..
ट्रेलरमध्ये सुरुवातीला प्रेमाची निरागस छटा दिसते. पण जसजशी कथा उलगडत जाते, तसतसे नात्यांतील गुंतागुंत, भावनिक संघर्ष, आणि सुडाची जळजळीत भावना उलगडत जाते. मैत्रीचं प्रेमात रूपांतर, प्रेमाचं तुटणं आणि त्यातून जन्माला आलेला सुड या सर्व भावना प्रभावीपणे दाखवल्या आहेत.
चित्रपटात प्रत्येक वळणावर एक धक्कादायक ट्विस्ट आहे. पात्रांचे बदलते स्वभाव आणि अकल्पनीय शेवट ही या कथेची खास वैशिष्ट्यं आहेत.
एकाच व्यक्तीकडून चौफेर योगदान
‘सजना’ या चित्रपटाची कथा, पटकथा, संवाद, दिग्दर्शन आणि निर्मिती सर्व काही शशिकांत धोत्रे यांनीच सांभाळलं आहे. त्यांच्या या एकट्या प्रयत्नातून उभा राहिलेला हा चित्रपट अनेक अंगांनी उल्लेखनीय ठरत आहे.
चित्रपटाचं छायाचित्रण रणजित माने यांनी केलं असून, संगीत ओंकारस्वरूप यांचं आहे. चित्रपटातील हृदयस्पर्शी रोमँटिक गाणी भुंगा म्युझिकच्या बॅनरखाली तयार करण्यात आली आहेत.
२७ जून २०२५
‘सजना’ आपल्या जवळच्या चित्रपटगृहात प्रदर्शित होणार आहे.
एक वेगळी, उत्कंठावर्धक आणि भावनिक सफर अनुभवण्यास सज्ज व्हा!
