सोलापूर | प्रतिनिधी
छत्रपती संभाजी महाराज आणि महाराणी ताराबाई यांच्याबाबत कथित आक्षेपार्ह व चुकीचे वक्तव्य केल्याच्या निषेधार्थ जैन मुनी आचार्य नयन पद्मसागर यांच्या विरोधात गुन्हा दाखल करण्याची मागणी करण्यात आली आहे. या संदर्भात फौजदार चावडी पोलीस ठाण्याचे पोलीस निरीक्षक महादेव राऊत यांना निवेदन देण्यात आले.
मराठा आंदोलक तथा मराठा क्रांती मोर्चाचे राज्य समन्वयक राम भैय्या जाधव यांनी दिलेल्या माहितीनुसार, संबंधित वक्तव्याचा व्हिडिओ पुरावा पोलिसांना सादर करण्यात आला आहे. या वक्तव्यात छत्रपती संभाजी महाराज आणि महाराणी ताराबाई यांच्या इतिहासाबाबत चुकीची माहिती मांडण्यात आल्याचा आरोप करण्यात आला आहे.
यावेळी आंदोलकांनी सांगितले की, महाराणी ताराबाई या सरसेनापती हंबीरराव मोहिते यांच्या कन्या व छत्रपती राजाराम महाराजांच्या धर्मपत्नी होत्या. तसेच धर्मरक्षक छत्रपती संभाजी महाराजांनी स्वराज्यासाठी बलिदान दिले असून त्यांच्या बदनामीचा प्रयत्न असह्य असल्याचे मत व्यक्त करण्यात आले.
संबंधितांवर तात्काळ गुन्हा दाखल करण्यात यावा, अन्यथा मराठा समाज व शिवशंभू भक्त रस्त्यावर उतरून आंदोलन करतील, असा इशाराही यावेळी देण्यात आला.
या प्रसंगी राम भैय्या जाधव यांच्यासह संभाजी ब्रिगेडचे जिल्हा संपर्क प्रमुख छत्रगुण माने, किरण शिरसागर, सागर गायकवाड, अक्षय माळोदकर, शुभम खटमोडे आदी उपस्थित होते.
