🌿 शहरात जंगल!राज्यात सुरू होतोय ‘अर्बन फॉरेस्ट’ मिशन.. प्रत्येक शहर हरित.!– उपमुख्यमंत्री एकनाथ शिंदे

MH13NEWS Network

राज्यातील शहरी भागात ‘अर्बन फॉरेस्ट’ उभारणीचा उपक्रम — उपमुख्यमंत्री एकनाथ शिंदे

राज्यात एक लाख हेक्टर क्षेत्रात बांबू लागवडीचे नियोजन

पंढरपूर, दि.2 : वाढत्या प्रदूषणामुळे वातावरणात होत असलेल्या अनिष्ट बदलांचा वेग रोखण्यासाठी राज्य सरकारकडून पर्यावरण संवर्धनाच्या दिशेने महत्त्वपूर्ण पावले उचलली जात आहेत. राज्यातील सर्व महापालिका, नगरपरिषदा, नगरपालिका आणि नगरपंचायतींमध्ये ‘अर्बन फॉरेस्ट’ तयार करण्याचा उपक्रम राबवण्यात येणार असून, नागरिकांनी यात सक्रिय सहभाग घ्यावा, असे आवाहन उपमुख्यमंत्री एकनाथ शिंदे यांनी केले.

पंढरपूर येथील शासकीय विश्रामगृहाच्या परिसरात महाराष्ट्र प्रदूषण नियंत्रण मंडळ, पर्यावरण विभाग आणि महाराष्ट्र सांस्कृतिक कला मंच ठाणे यांच्या संयुक्त विद्यमाने आयोजित ‘कार्तिकीची वारी – पंढरीच्या दारी’ या उपक्रमाच्या समारोपप्रसंगी ते बोलत होते.

या वेळी ग्रामविकास व पंचायतराज मंत्री तथा पालकमंत्री जयकुमार गोरे, रोजगार हमी व फलोत्पादन मंत्री भरत गोगावले, गृह (शहरे) व महसूल राज्यमंत्री योगेश कदम, प्रदूषण नियंत्रण मंडळाचे अध्यक्ष सिद्धेश कदम, आमदार समाधान आवताडे, तानाजी सावंत, राजू खरे, अभिजीत पाटील, माजी आमदार शहाजी पाटील, जिल्हाधिकारी कुमार आशीर्वाद, मुख्य कार्यकारी अधिकारी कुलदीप जंगम आदी मान्यवर उपस्थित होते.

उपमुख्यमंत्री शिंदे म्हणाले की, ग्लोबल वॉर्मिंग आणि हवामान बदलामुळे पावसाच्या अनियमिततेत वाढ झाली असून, अतिवृष्टी व पूरस्थितीमुळे शेतकऱ्यांचे मोठे नुकसान होत आहे. या पार्श्वभूमीवर पर्यावरण समतोल राखण्यासाठी वृक्ष लागवड आणि जनजागृती आवश्यक आहे.

ठाणे महापालिकेने ‘अर्बन फॉरेस्ट’ उपक्रमांतर्गत चार ठिकाणी मोठ्या प्रमाणावर वृक्ष लागवड केली असून, हा आदर्श सर्व शहरांनी घ्यावा, असेही त्यांनी सांगितले. राज्यात किमान एक लाख हेक्टर क्षेत्रात बांबू लागवडीचे नियोजन करण्यात आले असून, प्रदूषण नियंत्रण मंडळाने त्यासाठी विशेष प्रयत्न करावेत, असे निर्देश त्यांनी दिले.

शेतकऱ्यांवरील संकटाचा उल्लेख करताना शिंदे म्हणाले की, शासन शेतकऱ्यांच्या पाठीशी खंबीरपणे उभे आहे. कर्जमाफीसाठी समिती गठित करण्यात आली असून, तातडीची मदत थेट शेतकऱ्यांच्या खात्यावर जमा केली जात आहे.

त्यांनी पुढे सांगितले की, लहान मुलांपासूनच पर्यावरण संवर्धनाबाबत शिक्षण देणे आवश्यक आहे. आषाढी आणि कार्तिकी वारीपुरतेच नव्हे, तर वर्षभर राज्यभर पर्यावरण जनजागृतीचे कार्यक्रम राबवावेत, यासाठी प्रदूषण नियंत्रण मंडळ आणि पर्यावरण विभागाने संयुक्त नियोजन करावे.राज्याच्या गड-किल्ल्यांवर स्वच्छता मोहिम लवकरच रायगड किल्ल्यापासून सुरू होणार असल्याचेही शिंदे यांनी जाहीर केले. तसेच प्रदूषण मंडळाने पर्यावरण समतोल राखण्यासाठी कृत्रिम बुद्धिमत्तेचा (AI) वापर करावा आणि शेतकऱ्यांना नैसर्गिक शेतीकडे वळण्यासाठी प्रोत्साहन द्यावे, असे त्यांनी स्पष्ट केले.

महाराष्ट्र प्रदूषण नियंत्रण मंडळाचे अध्यक्ष सिद्धेश कदम यांनी यावेळी सांगितले की, पर्यावरणपूरक बांबू लागवडीचा उपक्रम मोठ्या प्रमाणावर हाती घेण्यात आला असून, राज्यभर पर्यावरण जनजागृती मोहीम राबवली जाणार आहे.

कार्यक्रमात संस्कृती कला मंचच्या वतीने कीर्तन, भारुड, गोंधळ आणि पोवाडा यांद्वारे पर्यावरण संवर्धनाचा संदेश देण्यात आला. या वेळी कीर्तनकार प्रकाश खांडगे, मानसी बडवे, शैलजा खांडगे, योगेश चिकटगावकर, शाहीर प्रवीण जाधव यांचा सन्मान करण्यात आला.

समारोप प्रसंगी उपमुख्यमंत्री शिंदे यांनी ‘कार्तिकीची वारी – पंढरीच्या दारी’ या उपक्रमाचा समारोप केला.प्रास्ताविक एम.डी. सिंह यांनी केले तर आभार संजय भुस्कुटे यांनी मानले.