MH 13 NEWS NETWORK
सोलापूर – (प्रतिनिधी)
सोलापूर महानगरपालिका निवडणुकीतील भारतीय जनता पार्टीच्या उमेदवारांनी प्रत्येक मतदारापर्यंत थेट संपर्क साधून भाजपाची ध्येयधोरणे, विकासकामे व शासनाच्या योजना पोहोचवाव्यात, असे स्पष्ट आवाहन पालकमंत्री जयकुमार गोरे यांनी केले.
महापालिका निवडणुकीच्या पार्श्वभूमीवर शनिवारी हॉटेल बालाजी सरोवर येथे भाजप उमेदवारांची बैठक पालकमंत्री गोरे यांच्या उपस्थितीत पार पडली. या बैठकीस आमदार देवेंद्र कोठे, भाजपाचे पश्चिम महाराष्ट्र संघटनमंत्री मकरंद देशपांडे, शहराध्यक्षा रोहिणी तडवळकर, माजी आमदार दिलीप माने, जिल्हा सरचिटणीस मनीष देशमुख आदी मान्यवर उपस्थित होते.
पालकमंत्री जयकुमार गोरे म्हणाले, भाजप पूर्ण ताकदीने ही निवडणूक लढवत असून उमेदवारांनी प्रभागनिहाय व्यापक जनसंपर्क साधावा. केंद्र व राज्यात भाजप सरकारने केलेली विकासकामे, धुळमुक्त सोलापूर, पाणीपुरवठ्यासाठी मंजूर ८९२ कोटी रुपये, विमानसेवा, आयटी पार्क, लाडकी बहीण योजना यांची माहिती घरोघरी जाऊन नागरिकांना द्यावी. केंद्र व राज्यात सत्ता असल्यामुळे सोलापूर शहरासाठी मोठ्या प्रमाणात निधी उपलब्ध करून देता येईल, हे नागरिकांपर्यंत पोहोचवावे, असेही त्यांनी सांगितले.
तसेच केंद्र व राज्य शासनाच्या योजना प्रभावीपणे पोहोचवण्यासाठी स्वतंत्र कार्यकर्त्यांचे गट तयार करावेत, सोशल मीडियावर अधिक सक्रिय राहावे आणि मतदार यादीतील प्रत्येक मतदारापर्यंत पोहोचण्याचे नियोजन करावे, अशा सूचनाही पालकमंत्र्यांनी दिल्या.
यावेळी भाजपाचे पश्चिम महाराष्ट्र संघटनमंत्री मकरंद देशपांडे यांनी मार्गदर्शन करताना बूथरचना, मतदार संपर्क, प्रचार नियोजन व हिशोब यामध्ये शिस्तबद्ध आणि नेटके काम करण्यावर भर दिला. सोलापूर महापालिकेची ही निवडणूक भाजपासाठी प्रतिष्ठेची असल्याने आवश्यक सर्व तांत्रिक प्रक्रिया वेळेत पूर्ण कराव्यात, असे त्यांनी सांगितले. सोलापूरच्या सर्वांगीण विकासासाठी शहरवासीयांचा भाजपाला पाठिंबा मिळवण्याचे आवाहनही त्यांनी केले.
या बैठकीस भाजपाचे पदाधिकारी व कार्यकर्ते मोठ्या संख्येने उपस्थित होते
