MH 13 news नेटवर्क
अक्षय तृतीय दिवशी जन्मलेल्या मुले व मुलींच्या नावे दोन हजारांची बँकेत ठेवी मिळणार : पहा कोणाचा आहे “हा” उपक्रम
सोलापूर : मध्यवर्ती श्री महात्मा बसवेश्वर जन्मोत्सव व समाजसेवा महामंडळ, सोलापूर यांच्या वतीने महात्मा बसवेश्वर जयंतीनिमित्त विविध धार्मिक, सांस्कृतिक व सामाजिक कार्यक्रमांचे आयोजन करण्यात आले असल्याची माहिती प्रसिद्धीपत्रकाद्वारे देण्यात आली आहे.
शुक्रवार दि. १७ एप्रिल २०२६ रोजी सायंकाळी ७.०० वाजता नीलकंठेश्वर मंदिर येथे कार्यक्रमाची सुरुवात होणार असून महात्मा बसवेश्वर यांच्या प्रतिमेचे पूजन व अभिवादन करण्यात येणार आहे. त्यानंतर विविध मान्यवरांच्या उपस्थितीत सांस्कृतिक कार्यक्रमांचे आयोजन करण्यात येणार आहे. या कार्यक्रमास विविध क्षेत्रातील मान्यवर, सामाजिक कार्यकर्ते व नागरिक मोठ्या संख्येने उपस्थित राहणार आहेत.
शनिवार दि. १८ एप्रिल २०२६ रोजी सकाळी ९.०० वाजता महिलांसाठी विशेष कार्यक्रमांचे आयोजन करण्यात आले आहे. महिला भजनी मंडळ, कीर्तन तसेच विविध सांस्कृतिक उपक्रमांद्वारे महिलांचा सहभाग नोंदविण्यात येणार आहे.
रविवार दि. १९ एप्रिल २०२६ रोजी सकाळी ९.०० वाजता महात्मा बसवेश्वर रथोत्सव व मिरवणूक शहरातील प्रमुख मार्गांवरून काढण्यात येणार आहे. या मिरवणुकीत विविध समाजघटक, संघटना, तसेच युवकांचा उत्स्फूर्त सहभाग राहणार आहे. सायंकाळी प्रमुख मान्यवरांच्या उपस्थितीत समारोप सोहळा पार पडणार आहे.
या जयंतीनिमित्त समाजातील विविध क्षेत्रात उल्लेखनीय कार्य करणाऱ्या व्यक्तींना सन्मानित करण्यात येणार असून विद्यार्थ्यांसाठी शैक्षणिक साहित्याचे वाटप देखील करण्यात येणार आहे. तसेच गरजू नागरिकांना विविध शासकीय योजनांची माहिती देऊन त्यांचा लाभ मिळवून देण्यासाठी मार्गदर्शन शिबिर आयोजित करण्यात येणार आहे.
या कार्यक्रमांच्या यशस्वीतेसाठी महामंडळाचे अध्यक्ष शरणराज संगण्णा केंगणाळकर, ट्रस्टी अध्यक्ष जांदिश पाटील व सर्व पदाधिकारी प्रयत्नशील असून नागरिकांनी मोठ्या संख्येने सहभागी व्हावे, असे आवाहन करण्यात आले आहे.
