MH 13News Network
राज्यभरातून मराठा बांधव नारायणगडाच्या दसरा मेळाव्याला मार्गस्थ झाले आहेत. नारायणगडाकडे येणाऱ्या सर्व मार्गांवर भगव्या ध्वज लावलेल्या दूर- दूर पर्यंत हजारो गाड्या दिसत आहेत. आज सकाळीच नारायणगड हाउसफुल झाल्याचं दिसून येत आहे.
मनोज जरांगे पाटील काय बोलणार याकडे राज्याचे लक्ष लागून राहिले आहे. आज ऐतिहासिक दसरा मेळावा होणार असून जवळपास 900 एकर परिसरात हा मेळावा आयोजित केला असल्याची माहिती मनोज जरांगे पाटील यांनी प्रसार माध्यमांना दिली आहे. बीड मधील प्रसिद्ध असलेल्या नारायणगड या ठिकाणी दसरा मेळाव्याचे आयोजन मनोज जरांगे पाटील यांनी केले आहे.
काल शुक्रवारी सायंकाळी पासून जवळपास 20 किलोमीटरच्या रांगा या नारायणगड कडे जाणाऱ्या रस्त्याला लागून राहिल्या होत्या. लाखो मराठा समाज बांधवांना मनोज जरांगे पाटील काय बोलणार याची उत्सुकता लागून राहिली आहे.
दरम्यान,नारायणगडावर आज सकाळपासून साधरण लाखों मराठा समाज बांधव जमा झाले आहेत. पार्किंग मध्ये वाहनांच्या रांगाच रांगा लागल्या असून सर्व पार्किंग आत्ताच फुल्ल झाले आहे. प्रशासन सर्वतोपरी सहकार्य करत असून मराठा सेवक दसरा मेळाव्यासाठी येणाऱ्या समाज बांधवांसाठी तैनात आहेत.
गेल्या वर्षी जरांगे पाटील यांनी घेतलेल्या सभेपेक्षा या सभेस प्रचंड मोठी गर्दी होणार असल्याचे दिसून येत आहे. लोकसभा निवडणुकीत मनोज जरांगे पाटील पॅटर्न गाजला. त्याच अनुषंगाने विधानसभेच्या आगामी निवडणुकीच्या पार्श्वभूमीवर जरांगे पाटलांच्या भूमिकेकडे सत्ताधारी आणि विरोधी पक्षाचे लक्ष लागून राहिले आहे.
सर्व मराठा बांधवांनी वाहने सावकाश चालवावीत. स्वतःची व इतरांची काळजी घ्यावी. असे आवाहन मनोज जरांगे पाटील यांच्या समर्थकांकडून करण्यात येत आहे.