MH13NEWS Network
सोलापूर | प्रतिनिधी
सोलापुरातील आस्था रोटी बँकेने अक्षय तृतीयानिमित्त, तसेच भगवान परशुराम जयंती व महात्मा बसवेश्वर जयंती या पावन दिवशी, माणुसकीची सुवास पसरवणारे भावनिक आणि सेवाभावी उपक्रम राबवले.
कार्यक्रमाची सुरुवात भगवान परशुराम व महात्मा बसवेश्वर यांच्या प्रतिमेच्या पूजनाने झाली. या पूजनास रामचंद्र तडवळकर, डॉ. जानवी माखीजा व लक्ष्मीकांत बिराजदार या प्रमुख मान्यवरांची उपस्थिती लाभली.
यानंतर, छत्रपती शिवाजी महाराज रुग्णालयातील (सिव्हिल हॉस्पिटल) रुग्णांच्या नातेवाईकांसाठी खास आमरस व पुरणपोळीच्या मिष्टान्न भोजनाचे आयोजन करण्यात आले. रुग्णांच्या तणावग्रस्त चेहऱ्यांवर समाधानाचा हास्यफुलारा फुलला.
“सणाच्या दिवशी घरापासून दूर असूनही, इथे घरचीच ऊब मिळाली,” अशा भावनिक प्रतिक्रिया काही नातेवाईकांनी दिल्या.
या नंतर, कुमठा नाका येथील भारतमाता नगरीत राहणाऱ्या महिला कुष्ठरोगींना कीर्तनाचा अनुभव देण्यासाठी खास कार्यक्रम आयोजित करण्यात आला.
ह. भ. प. अरुंधती महाराज भोसले आणि त्यांच्या सहकाऱ्यांनी जीवनातील साध्या उदाहरणांनी स्फूर्तिदायक कीर्तन सादर केले. कीर्तनानंतर महिलांना स्नेहपूर्वक मिष्टान्न भोजनही देण्यात आले.यापैकी अनेक महिलांनी याआधी टीव्हीवरच कीर्तन पाहिले होते,
परंतु प्रत्यक्ष कीर्तन अनुभवण्याची इच्छा आज प्रत्यक्षात उतरली. “मंदिरात जाऊन कीर्तन ऐकण्याची इच्छा असूनही शारीरिक व्यंगांमुळे शक्य नव्हते, परंतु आज आमच्यासाठी मंदिरच इथे आलं,” अशा प्रतिक्रिया त्यांनी दिल्या.
या सर्व उपक्रमांमुळे समाजातील दुर्लक्षित, एकाकी आणि उपेक्षित घटकांपर्यंत प्रेम, आपुलकी आणि आस्था पोहचविण्याचा प्रयत्न यशस्वी झाला.
कार्यक्रम यशस्वी करण्यासाठी अध्यक्ष विजय छंचुरे, तसेच नीलिमा हिरेमठ, कांचन हिरेमठ, छाया गंगणे, स्नेहा वनकुद्रे, संपदा जोशी, अनिता तालीकोटी, राधा मॅडम, मंगल पांढरे, अविनाश मार्चला यांनी महत्त्वाचे योगदान दिले.सूत्रसंचालन छाया गंगणे, तर आभार प्रदर्शन स्नेहा वनकुद्रे यांनी केले.
