MH 13News Network
जरांगे पाटलांवर टीका करणाऱ्या बारस्करांवर ‘ प्रहार ‘ ; आमदार बच्चू कडूंनी घेतला मोठा निर्णय
मराठा आरक्षणासाठी राज्यभर आंदोलन करणाऱ्या मनोज जरांगे पाटलांवर खालच्या पातळीवर जाऊन टीका करणारे अजय बारस्कर यांना प्रहार जनशक्ती पक्ष व प्रहार वारकरी संघटना मधून बडतर्फ करण्यात आल्याचा पक्षादेश आमदार बच्चू कडू यांनी आज बुधवारी 21 फेब्रुवारी रोजी काढला.
मराठ्यांचे नेते मनोज जरांगे पाटील यांच्यावर वेगवेगळ्या सोशल मीडियाच्या माध्यमातून तोंडसुख घेणारे प्रहार जनशक्ती पक्ष व प्रहार वारकरी संघटनेचे अजय बारस्कर यांना आज पक्षातून बडतर्फ केल्याची घोषणा आमदार बच्चू कडू यांनी केली.
वाचा ,नेमके आदेशात काय म्हटले..
पक्षामध्ये कोणीही श्री.मनोज जरांगे पाटील यांच्या नेतृत्वात सुरू असलेल्या मराठा आरक्षणाविषयी किंवा इतर आरक्षण किंवा नेत्यांबद्दल कोणतीही भूमिका मांडू नये .असे केल्यास त्या व्यक्तीचा प्रहार जनशक्ती पक्षाशी काही संबंध राहणार नाही. पक्षाची अधिकृत भूमिका पक्षाचे संस्थापक अध्यक्ष आमदार श्री बच्चुभाऊ कडू हेच स्वतः मांडतील. इतर कोणीही माननीय अध्यक्षांच्या मान्यतेशिवाय आपली भूमिका मांडू नये.
आज दिनांक 21 फेब्रुवारी रोजी श्री अजय बारस्कर यांनी जी भूमिका श्री मनोज जरांगे पाटील यांच्या विषयी मांडली. त्या संदर्भात प्रहार जनशक्ती पक्ष किंवा प्रहार वारकरी संघटना समर्थन करत नाही किंवा काहीही संबंध नाही
तरी श्री अजय बारस्कर यांना प्रहार जनशक्ती पक्ष व प्रहार वारकरी संघटनेमधून बडतर्फ करण्यात येत आहे .त्यांचा पक्षाशी आजपासून काहीही संबंध राहणार नाही. याची सर्वांनी नोंद घ्यावी.
प्रहार जनशक्ती पक्षाने प्रसिद्धीपत्रक काढून आपली भूमिका स्पष्ट केली आहे.
