MH 13 NEWS NETWORK
नंदीध्वजधारकांकडून कसून सराव सुरू
सोलापूर, दि. ४- शिवयोगी श्री सिध्दरामेश्वर महाराज यांची यात्रा अवघ्य एका महिन्यावर आली असल्याने नंदीध्वजधारकांच्या उत्साहाला उधाण आले आहे. नंदीध्वजधारकांकडून सराव करून घेण्यास मास्तर मंडळी व्यस्त झाली आहेत. गेल्या आठवड्यापासून याचा सराव केला जात आहे. श्री ग्रामदैवत सिद्धेश्वर यात्रा काही दिवसांवर आल्याच्या पार्श्वभूमीवर नंदीध्वज पेलण्याचा सराव अंतिम टप्यात आल्याचे दिसून येते.
दिवाळी संपल्यानंतर सोलापूरकरांच्या मनात ग्रामदैवत शिवयोगी श्री सिध्दरामेश्वरांच्या यात्रेबद्दल ओढ लागलेली असते. या यात्रेचे प्रमुख वैशिष्ट्य असलेल्या नंदीध्वज आणि नंदीध्वजधारकांबद्दल विलक्षण आकर्षण असल्याने भक्तांमध्ये सराव नंदीध्वजांची पूजा करण्याची प्रथा आहे. नंदीध्वज पूजा केल्यानंतर नंदीध्वजधारकांना अधिक ऊर्जा मिळावी म्हणून सेवेकऱ्यांना सुकामेवा खिरीचे जेवण देण्याची परंपरा आहे. खिरीसोबत तूप, केळी आणि दुधाला प्राधान्य दिले जाते. यात्रेत सर्व समाजाचे मिळून मानाचे सात नंदीध्वज असून नंदीध्वज पेलण्याचा कसून सराव मास्तरांकडून करुन घेतला जात आहे. होम मैदान, सम्मती कट्टा, बाळीवेस, मल्लिकार्जुन मंदिर, गांधी नाथा मैदान, सम्राट चौक, चाटी गल्ली, विजापूरवेस ते मधला मारुती, तुळजापूर वेस, रुपाभवानी रोड परिसरात नंदीध्वज सराव सुरु आहे. सकाळी, दुपारी आणि रात्री असे तीन वेळा नंदीध्वजधारकांना नंदीध्वज पेलण्याचे कौशल्य शिकविले जात आहे.
चौकट
वजन पेलण्याचा सराव व्हावा यासाठी सरावादरम्यान सराव काठ्यांना लोखंडी साखळी बांधून तयारी करून घेतली जात आहे. भक्ती आणि शक्तीच्या संगमातूनच पात्रेत काठी पेलणे शक्य होते. नंदीध्वज पेलण्यासाठी कौशल्य लागते, कसून सराव करावा लागतो. यात्रेच्या एक महिना आधी आम्ही सरावाला सुरुवात करत असल्याची माहिती तिसऱ्या नदीध्वजाचे मास्तर रेवणसिध्द माळी यांनी सांगितली
