MH 13 News Network
शहर उत्तर मधील बाळे भागातील संतोष नगर या भागात राहत्या घरात ड्रेनेजचे मैला मिश्रित पाणी आज गुढीपाडव्याच्या सणाच्या दिवशी आल्याने नागरिक त्रस्त झाले आहेत. भाजप युवा नेत्याने त्यांचा प्रश्न तात्पुरता सोडवला असला तरी समस्येचा कायमचा निकाल लावावा अशी मागणी नागरिकांनी केली आहे.
संतोष नगर मधील रहिवासी अजिनाथ पवार,बबन मंडलिक,आत्माराम गावडे,राजाबाई झळके,विनायक धाकपडे,लक्ष्मण माळी,शाम मुंडे,पुरुषोत्तम दुनाके,संतोष पवार,आकाश मोरे,अमर धाकपाडे यांच्या भागात ड्रेनेजचे मैला मिश्रित पाणी शिरले आहे.
ज्या दिवशी पाण्याचा दिवस असतो म्हणजेच पिण्याचे पाणी येते. त्यादिवशी अक्षरशः घरामध्ये ड्रेनेजचे मैला मिश्रित पाणी घुसते.या घाण पाण्यामुळे नागरिकांच्या आरोग्याला धोका निर्माण झाला आहे.
आज गुढीपाडव्याच्या शुभ दिवशी सुद्धा या समस्यांना नागरिकांना सामोरे जावे लागले होते. या भागातील भाजप युवानेते आनंद भवर यांनी संतोष नगर भागात नागरिकांच्या भेटी घेऊन समस्या जाणली. आणि लागलीच तात्पुरत्या स्वरूपात महापालिकेच्या संबंधित विभागाला सांगून लाईन तात्पुरती सोडवली आहे. याबद्दल नागरिकांनी समाधान व्यक्त केले आहे.
तर…गांधीगिरी मार्गाने घाण पाण्यात…!
संतोष नगर मधील नागरिकांची मैला मिश्रित ड्रेनेज पाण्याची समस्या दूर केली आहे. महापालिकेच्या हेड ऑफीसला सांगून ती लाईन तात्पुरती सोडवली आहे,तरी महापालिकेने ते काम लवकरात-लवकर करून तेथील नागरिकांना त्या नरक यातनेतून बाहेर काढावे, अन्यथा दोन वर्षांपूर्वी असेच पाणी काहीजणांच्या घरात घुसल्यामुळे महापालिकेच्या अधिकाऱ्यांना त्या घाण पाण्यात बसवून चहा पाजण्याचा कार्यक्रम केला होता, तसाच आता यावेळेस त्याच घाण पाण्यात बसवून जेवणाचा कार्यक्रम गांधीगिरी मार्गाने केला जाईल.
आनंद भवर, भाजप युवा नेते
