MH13NEWS Network
सोलापूर (प्रतिनिधी):सोलापूर महापालिकेच्या विभागीय कार्यालय क्रमांक २ च्या कार्यक्षेत्रातील प्रभाग क्र. १० मधील E ग्रुप विडी घरकुल, पोषम्मा चौक परिसरातील रहिवाशांनी दूषित पाणीपुरवठ्याच्या तक्रारी केल्यानंतर महापालिकेने तत्काळ कारवाई करत संपूर्ण प्रकरणाची इंडोस्कॉपी कॅमेऱ्याद्वारे सखोल तपासणी केली.
शंभो मारुती मंदिरासमोर पिण्याच्या पाण्यात गढूळपणा व दुर्गंधी येत असल्याच्या तक्रारी प्राप्त झाल्यानंतर मक्तेदार सगर यांच्या माध्यमातून इंडोस्कोपी तपासणी करण्यात आली.
तपासणीदरम्यान, पाण्याची पाइपलाइन आतून पूर्णतः गंजलेली असून गाठी निर्माण झाल्या आहेत, हे स्पष्ट झाले. याशिवाय पाइपलाइनच्या शेवटच्या ३ मीटर अंतरात ४ टॅप कनेक्शन पैकी २ कनेक्शन बंद, तर २ कनेक्शन कार्यरत असल्याचे निदर्शनास आले.विशेष म्हणजे, एका कनेक्शनचा बेंड पूर्णतः कुजलेला होता व त्याच्या शेजारीच जुन्या ड्रेनेजचे घरगुती कनेक्शन असल्याने पाण्यात ड्रेनेज मिसळण्याची शक्यता निर्माण झाली होती.
या कुजलेल्या बेंडमधून ड्रेनेजचे पाणी पिण्याच्या पाण्याच्या पाइपलाईनमध्ये शिरत असल्याचे स्पष्ट झाले आहे.पाणीपुरवठा निगेटिव्ह फिडींग पद्धतीने (Negative Feeding) होत असल्याने इंडोस्कोपी करताना ८ ते १२ मीटर पाइपलाइनमधील संपूर्ण भाग पाण्यात बुडालेला आढळून आला. त्याच ठिकाणी ४ इंची वॉशआऊट व्हॉल्व्ह बसवण्यात आले असून, सध्या तेथे सुधारणा प्रक्रिया सुरू आहे.
या पार्श्वभूमीवर आयुक्त डॉ. सचिन ओम्बासे यांनी शहरातील अशा दूषित पाणीपुरवठा होत असलेल्या भागांमध्ये तात्काळ इंडोस्कोपी कॅमेऱ्याद्वारे तपासणी करण्याचे निर्देश दिले आहेत. तसेच, जिथे जिथे पाइपलाइन जीर्ण व धोकादायक अवस्थेत आहे, तेथील पाइपलाइन बदलण्यासाठी आवश्यक तेवढा निधी प्राधान्याने उपलब्ध करून दिला जाईल, असेही त्यांनी स्पष्ट केले.
