मनीषा माने मुसळे यांना जामीन मंजूर; सुसाईड नोटवर संशय
सोलापूर | प्रतिनिधी
ज्येष्ठ डॉक्टर शिरीष वळसंगकर यांच्या आत्महत्येप्रकरणी अटकेत असलेल्या मनीषा माने मुसळे हिला जिल्हा व सत्र न्यायालयाकडून अखेर जामीन मंजूर करण्यात आला आहे.
न्यायमूर्ती जयदीप मोहिते यांनी सदर निर्णय देताना या प्रकरणातील अनेक बाबींवर संशय व्यक्त झाला असल्याचे अधोरेखित केले.
दिनांक 17 एप्रिल 2025 रोजी मनीषा माने हिने डॉक्टर वळसंगकर, त्यांची पत्नी उमा वळसंगकर आणि इतर दोघांना ई-मेलद्वारे काही आरोप केले होते. त्यानंतर माफीनामाही सादर करण्यात आला. मात्र 18 एप्रिल रोजी डॉक्टर वळसंगकर यांनी स्वत:च्या बंदुकीतून गोळी झाडून आत्महत्या केली. या प्रकरणी त्यांचा मुलगा अश्विन वळसंगकर याने बझार पोलीस ठाण्यात फिर्याद दिली होती.
जामीन अर्जात मांडण्यात आलेले मुद्दे –
ई-मेलमध्ये घाणेरडे आरोप नव्हते, केवळ एका कर्मचाऱ्याने मालकाकडे दाद मागितली होती.
ई-मेलनंतर माफीनामा दिला गेला आणि तो विषय तिथेच संपला होता.
सुसाईड नोट दुसऱ्या दिवशीच जप्त करण्यात आली, जी बाब संशयास्पद असल्याचे सांगितले.
डॉक्टरांनी 2001 नंतर मराठीत लिखाण केले नव्हते, तरीही सुसाईड नोट मराठीत..
हेही एक संशयाचं कारण.
दोषारोपपत्रात 44 साक्षीदार असून बहुतांश कर्मचारी वर्ग आहे, मात्र आत्महत्येशी थेट संबंध स्पष्ट नाही
.सी.सी.टी.व्ही फुटेज आणि कॉल डिटेल्स सादर न केल्याने तपास अपूर्ण असल्याचे प्रतिपादन
.“या संपूर्ण प्रकरणात खरा गुन्हेगार सुटला असून, मनीषा मानेला बळीचा बकरा बनवण्यात आलं आहे,” असा ठपका आरोपीच्या वकिलांकडून ठेवण्यात आला.
या प्रकरणात मनीषा माने हिच्या वतीने ॲड. प्रशांत नवगिरे, ॲड. श्रीपाद देशक व ॲड. सिद्धाराम पाटील यांनी बाजू मांडली. तर सरकार पक्षातर्फे जिल्हा सरकारी वकील ॲड. प्रदीपसिंग राजपूत यांनी काम पाहिले.
शहरात वैद्यकीय क्षेत्रातील नावाजलेल्या डॉक्टराच्या आत्महत्येचा गुंता आणखी खोलात जात असल्याचे या निकालावरून दिसून येते. पुढील सुनावणी दरम्यान या प्रकरणाला कोणती कलाटणी मिळते, याकडे सर्वांचं लक्ष लागून राहिलं आहे.
