MH 13 news network
सोलापूर, दि. ३१ (प्रतिनिधी) – शेअर मार्केटमध्ये गुंतवणुकीच्या नावाखाली ७२ लाख ६४ हजार रुपयांची ऑनलाईन फसवणूक केल्याप्रकरणी अटक करण्यात आलेल्या नेपाळ येथील आरोपीस न्यायालयाने जामीन मंजूर केला आहे.
सायबर पोलीस ठाण्यात दाखल गुन्ह्यानुसार, एका अनोळखी महिलेने WhatsApp व Facebook द्वारे फिर्यादीशी संपर्क साधून शेअर मार्केटमध्ये गुंतवणूक केल्यास मोठा नफा मिळेल, असे आमिष दाखवले. त्यानंतर विविध ऑनलाईन लिंक पाठवून फिर्यादीकडून वेगवेगळ्या बँक खात्यांमध्ये एकूण ७२,६४,००० रुपये जमा करून घेतले. मात्र, कोणताही परतावा न देता फसवणूक करण्यात आली.
या प्रकरणी सायबर पोलीस ठाण्यात गुन्हा क्रमांक ०४/२०२५ नोंदवण्यात आला असून, भारतीय न्याय संहिता कलम ३१८(४), ३१९(२), ३(५) तसेच आयटी अॅक्ट कलम ६६(सी), ६६(डी) अंतर्गत गुन्हा दाखल करण्यात आला आहे.
तपासादरम्यान पोलिसांनी ९ मार्च २०२६ रोजी नेपाळ येथील आरोपी रोज थापा मगर राधेशाम यास दिल्ली येथून अटक केली. त्यानंतर त्याला सोलापूर येथील प्रथम वर्ग न्यायदंडाधिकारी एन. ए. मोर यांच्या न्यायालयात हजर करण्यात आले. न्यायालयाने सुरुवातीला आरोपीस पाच दिवसांची पोलीस कोठडी सुनावली होती. त्यानंतर न्यायालयीन कोठडीत ठेवण्याचा आदेश देण्यात आला होता.
दरम्यान, आरोपीने जामिनासाठी न्यायालयात अर्ज दाखल केला. सुनावणीवेळी आरोपीच्या वकिलांनी युक्तिवाद करताना आरोपीचा गुन्ह्यात प्रत्यक्ष सहभाग नसून, केवळ संशयावरून अटक करण्यात आल्याचे सांगितले. तसेच आरोपीविरुद्ध कोणताही ठोस पुरावा उपलब्ध नसल्याचे नमूद करत जामीन मंजूर करण्याची मागणी केली.
यास तपासी अधिकारी व सरकारी वकिलांनी जोरदार विरोध दर्शविला. मात्र, दोन्ही बाजूंचा युक्तिवाद ऐकल्यानंतर न्यायालयाने आरोपीस ५० हजार रुपयांच्या जामिनावर मुक्त करण्याचा आदेश दिला.
या प्रकरणात आरोपीतर्फे अॅड. सुरेश बिराजदार, अॅड. स्नेहा पासनूर व अॅड. लक्ष्मी हेब्बाळे यांनी काम पाहिले.
