श्री सद्गुरू प्रभाकर स्वामी महाराज मंदिरात रविवारी संत भेटीचा सोहळा
संत गजानन महाराज पालखीचे होणार आगमनसोलापूर : प्रतिनिधी
आषाढी एकादशीनिमित्त शेगाव होऊन पंढरपूरला निघालेल्या शेगाव संस्थानची श्री संत गजानन महाराजांची पालखी रविवारी (दि.२९) सम्राट चौक येथील श्री सद्गुरू प्रभाकर महाराज मंदिरात येणार आहे. त्यानिमित्त मंदिरात संत भेटीचा सोहळा होणार असल्याची माहिती श्री सद्गुरू प्रभाकर महाराज मंदिर ट्रस्टचे चीफ ट्रस्टी मोहन बोड्डू यांनी दिली.
श्री संत गजानन महाराज पालखी सोलापूरात आल्यानंतर सकाळी ११.३० वाजता प्रभाकर महाराज मंदिरात येईल. या ठिकाणी श्री सद्गुरू प्रभाकर महाराज व श्री संत शेगाव गजानन महाराज यांच्या पालखी भेटीचा सोहळा होईल. श्री सद्गुरू प्रभाकर महाराज मंदिरातर्फे पालखीचे पूजन होणार आहे.
श्री संत गजानन महाराजांचा आवडता पदार्थ असलेल्या पिठलं भाकरीचा नैवेद्य यावेळी दाखवला जाईल. यानंतर आरती होऊन भाविकांना दर्शन व महाप्रसाद देण्यात येणार आहे. भाविकांनी याप्रसंगी उपस्थित रहावे आणि दर्शनाचा तसेच महाप्रसादाचा लाभ घ्यावा, असे आवाहन श्री सद्गुरु प्रभाकर महाराज मंदिर ट्रस्टचे ट्रस्टी उदय वैद्य यांनी केले आहे.
