मंगळवेढ्याचे दोघे युवक निघाले अंतरावली सराटीकडे
मराठा आरक्षणासाठी उपोषणाच्या माध्यमातून राज्यात पुन्हा एकदा मराठा समाजात संजीवनी निर्माण करण्याचे काम मनोज जरांगे पाटील यांनी केले आहे. दिनांक 14 ऑक्टोंबर रोजी अंतरवली सराटी या ठिकाणी त्यांची मोठी जाहीर सभा आयोजित करण्यात आली आहे. त्या सभेसाठी सोलापूर जिल्ह्यातील मंगळवेढा तालुक्यातील दोन युवक सायकल वरून जाहीर सभेत सहभागी होण्यासाठी निघालेले आहेत.
मनोज जरांगे पाटील यांच्या मूळ गावी अंतरवाली सराटी येथे होणाऱ्या सभेसाठी सार्वजनिक शिवजयंती उत्सव मंडळाचे माजी अध्यक्ष,वारी परिवाराचे सदस्य प्रा.विनायक कलुबर्मे व सिद्धेश्वर डोंगरे सायकल वरती 300 किलोमीटर प्रवास करत सभा ठिकाणी जाणार आहेत.
सर्वसाधारणपणे दररोज शंभर किमी प्रवास ते करणार आहेत. मराठा समाजाला ओबीसी प्रवर्गातून ५० टक्क्यांच्या आत आरक्षण मिळावे, ही मनोज जरांगे-पाटील आणि असंख्य समाज बांधवांची मागणी आहे. या मागणीसाठीच त्यांनी जालना जिल्ह्यातील अंतरवाली सराटी गावात महासभेचे आयोजन केलेले आहे. महाराष्ट्रातून विविध भागातून मराठा बांधव या सभेसाठी लाखोंच्या संख्येने येणार आहेत .मंगळवेढ्यातील या दोन युवकांनी सायकल वरती 300 किमी प्रवास करून त्या सभेसाठी पाठिंबा दर्शवणार आहेत. याचे सर्व मराठा बांधवातून कौतुक होत आहे.
आपल्या पुढच्या पिढीच्या भविष्यासाठी आता नाही तर कधीच नाही मराठा आरक्षणाची ही शेवटचीच लढाई ठरावी यासाठी आपण सायकल वरती प्रवास करत सभेला जायचे ठरवले आहे-
प्रा विनायक कलुबर्मे
दरम्यान, 14 ऑक्टोंबरच्या अंतरवाली सराटी येथील त्यांच्या जाहीर सभेसाठी त्यांनी गावोगाव, जिल्हाभर मोठ्या प्रमाणावर वातावरण निर्मिती केली आहे. याच पार्श्वभूमीवर सोलापूर जिल्ह्यातून शेकडो वाहनांमधून हजारो मराठा समाज बांधव जाहीर सभेसाठी जाणार आहेत.
मनोज जरांगे पाटील यांच्या 14 ऑक्टोबरच्या सभेसाठी प्रा.विनायक कलुबरमे व सिद्धेश्वर डोंगरे मंगळवेढा ते अंतरावाली-सराटी ३०० किमी सायकल प्रवास आज सकाळी सहा वाजल्यापासून सुरू केला आहे. ३ दिवसात प्रवास ते पूर्ण करणार आहेत.अशी माहिती सकल मराठा समाजाचे समन्वयक माऊली पवार यांनी दिली.
आज सकाळी 11 वाजता छत्रपती संभाजी राजे चौकात या दोन सायकल स्वारांचे स्वागत सकल मराठा समाजाच्या वतीने करण्यात येणार असून त्यांना पुष्पगुच्छ व मानाचा शेला देऊन त्यांचा सन्मान करण्यात येणार आहे.असे ही त्यांनी सांगितले.
