सोलापूर | प्रतिनिधी
माजी महापौर मनोहर सपाटे आणि ज्ञानेश्वर सपाटे यांच्याविरुद्ध फौजदार चावडी पोलीस ठाण्यात प्राचीन स्मारक कायद्याअंतर्गत गुन्हा दाखल करण्यात आला आहे.
शहरातील भुईकोट किल्ला हा शासनाने संरक्षित स्मारक म्हणून घोषित केलेला असून, त्याच्या संरक्षित भिंतीपासून ३०० मीटर परिसरात कोणतेही बांधकाम, दुरुस्ती किंवा खोदकाम करण्यास कायद्याने मनाई आहे. असे असतानाही संबंधित आरोपींनी पुरातत्व विभागाची पूर्वपरवानगी न घेता अनधिकृत बांधकाम केल्याचे उघड झाले आहे.
या प्रकरणी पुरातत्व विभागाचे कर्मचारी ऋषिराज सिंह सोलंकी यांनी दिलेल्या तक्रारीवरून मनोहर गणपत सपाटे व ज्ञानेश्वर बबन सपाटे यांच्याविरुद्ध गुन्हा नोंदविण्यात आला आहे. यापूर्वी नोटीस देऊनही त्यांनी परवानगी न घेता बांधकाम पूर्ण केल्यामुळे त्यांच्यावर प्राचीन स्मारके व पुरातत्व स्थळे व अवशेष अधिनियम, १९५८ च्या कलम ३० अंतर्गत कारवाई करण्यात आली आहे.
या प्रकरणाचा पुढील तपास पोलीस हवालदार प्रवीण पवार यांच्याकडे सोपविण्यात आला आहे.
दरम्यान, प्रशासनाने नागरिकांना आवाहन केले आहे की संरक्षित स्मारकांच्या परिसरात कोणतेही बांधकाम करण्यापूर्वी संबंधित विभागाची परवानगी घेणे बंधनकारक आहे. नियमांचे उल्लंघन केल्यास कठोर कारवाई करण्यात येणार आहे.
याशिवाय, अनधिकृत बांधकाम प्रकरणात कोणी हस्तक्षेप किंवा दबाव टाकण्याचा प्रयत्न केल्यास संबंधित नगरसेवकाचे पदही रद्द होऊ शकते, असा इशारा ॲड. योगेश पवार यांनी दिला आहे.
