दिनांक १८/१२/२०२३ रोजी, गुन्हे शाखेचे स.पो.नि. संदीप पाटील व त्यांचे तपास पथकातील अंमलदार असे सोलापूर शहरात मालाविषयक गुन्हयातील आरोपींचा शोध घेण्यासाठी पेट्रोलींग करीत असताना, सपोनि संदीप पाटील यांना गोपनीय बातमीदाराकडून खात्रीशीर बातमी मिळाली की, संत चोखामेळा मंदिर, लक्ष्मी पेठ, सोलापूर येथे रोडलगत, एक लाल रंगाची एम.एच.१३ ई.एफ.००९७ ही स्विप्ट कार थांबली असुन, सदर कार चालकाकडे देशी बनावटीचे गावठी पिस्तुल आहे. त्या अनुषंगाने सपोनि संदीप पाटील व त्यांचे पथकातील अंमलदार यांनी संत चोखा मेळा मंदिर, लक्ष्मी पेठ, सोलापूर येथे सापळा लावुन, लाल रंगाची कार क्र. एम.एच.१३ ई.एफ.००९७ ही पकडली.
त्यानंतर, वर नमूद कार मधील चालक मनोज विभीषण सुरेराव, वय-३८ वर्षे, व्यवसाय-शेती, रा.३८१. लक्ष्मी पेठ, दमाणी नगर, सोलापूर असे असल्याचे सांगितले. त्यानंतर, त्याची सपोनि संदीप पाटील यांनी अंगझडती घेतली असता, त्याचे पॅन्टमध्ये डावे बाजूस कंबरे जवळ एक देशी बनावटीचे गावठी पिस्तुल खोचलेल्या अवस्थेत मिळून आले. तसेच त्याचे पॅन्टच्या उजव्या खिशात १० जिवंत काडतूस मिळून आले. सदर पिस्तुल व काडतुसे ही बेकायदा विनापरवाना त्याने जवळ बाळगलेचे चौकशीत निष्पन्न झाले.
सहायक पोलिस निरीक्षक संदीप पाटील यांनी, त्या इसमाकडे मिळून आलेले एक देशी बनावटी गावठी पिस्तुल, १० जिवंत काडतुसे, व त्यांचेकडे मिळुन आलेली चारचाकी कार असा एकुण ७,६०,०००/- ( सात लाख साठ हजार रुपये) किंमतीचा मुद्देमाल जप्त केला आहे.
सदर बाबत फौजदार चावडी पोलीस ठाणे, सोलापूर शहर येथे गुरनं-७०८/२०२३ भारतीय हत्यार कायदा कलम ३/२५ प्रमाणे गुन्हा दाखल करण्यात आला आहे. सदर गुन्हयाचा अधिक तपास सुरु आहे.
सदरची कामगीरी श्री. डॉ. राजेंद्र माने, पोलीस आयुक्त, सोलापूर शहर, डॉ. दीपाली काळे, पोलीस उप-आयुक्त, गुन्हे, श्रीमती प्रांजली सोनवणे, सहायक पोलीस आयुक्त, गुन्हे, सुनिल दोरगे, वरिष्ठ पोलीस निरीक्षक, गुन्हे शाखा, सोलापूर शहर, यांचे मार्गदर्शनाखाली, सहायक पोलीस निरीक्षक संदिप पाटील, श्रीनाथ महाडीक व पोलीस अंमलदार अंकुश भोसले, विजयकुमार वाळके,अर्चना स्वामी, विद्यासागर मोहिते, गणेश शिंदे, सुभाष मुंढे, शैलेश बुगड, अभिजीत धायगुडे, आबाजी सावळे, निलोफर तांबोळी, रत्ना सोनवणे, सायबर विभागातील अविनाश पाटील, चालक- बाळासाहेब काळे, यांनी केली आहे.
