MH 13 News Network
मराठा आरक्षण आंदोलनाचे नेते मनोज जरांगे पाटील उद्या बुधवारी सोलापुरात शांतता रॅली काढणार असून त्यांची भव्य जाहीर सभा होणार आहे. त्यानिमित्ताने येणाऱ्या समाज बांधवांसाठी अक्कलकोट अन्नछत्र मंडळातर्फे 50 हजार पाणी बॉटल, 50 हजार लाडू, चिवडा पाकीट प्रसाद रुपाने आज मंगळवारी रात्री मराठा क्रांती मोर्चाच्या समन्वयकांना देण्यात आले. हा मिळालेला समर्थांचा प्रसादच आहे अशी भावना यावेळी उपस्थित मराठा समाज बांधवांनी व्यक्त केली.
बुधवारी छत्रपती शिवाजी महाराज चौकात मनोज जरांगे पाटील यांची भव्य सभा होणार असून या निमित्ताने जिल्ह्यातील ग्रामीण भागातून मोठ्या प्रमाणावर समाजबांधव एकवटणार आहे. त्यांना अल्पोपहार, पाणी मिळणे गरजेचे आहे.
ही गरज ओळखून श्री स्वामी समर्थ अन्नछत्र मंडळाचे प्रमुख अमोल राजे भोसले यांनी मराठा क्रांती मोर्चाच्या समन्वयकांना मोठ्या प्रमाणावर प्रसादरुपी मदत केली आहे.
याबाबत मराठा क्रांती मोर्चाचे समन्वयक अमोल शिंदे यांनी अन्नछत्र मंडळाचे आभार मानले असून समर्थांचा हा मराठा आरक्षणाला मिळालेला आशीर्वाद आहे. लवकरच आरक्षण आंदोलनाला यश येईल अशी प्रतिक्रिया त्यांनी व्यक्त केली. उद्या एक ही समाज बांधव उपाशीपोटी येथून जाणार नाही याची काळजी आम्ही घेत आहोत. गरजेच्या ठिकाणी फूड पॅकेट देण्याची व्यवस्था करण्यात आली आहे. त्यासाठी स्टॉल उभारले आहेत. मराठा स्वयंसेवकाच्या माध्यमातून सर्व व्यवस्था करण्यात आली असल्याची माहिती त्यांनी दिली.
