MH 13NEWS NETWORK
उत्तर मतदारसंघ हा भाजपाचा बालेकिल्ला मानला जातो. विजयकुमार देशमुख हे गेल्या चार टर्म पासून येथील आमदार आहेत. सर्वसामान्य नागरिकांशी सहज संपर्क ही त्यांची खासियत असून याच उत्तर मतदारसंघात आपले राजकीय भवितव्य आजमावण्यासाठी काही मराठा नेते मोर्चेबांधणी करत असल्याचे दिसून येत आहे.
जरांगे पाटील यांच्या आंदोलनात सक्रिय सहभाग असणारे राजन जाधव त्यांनी काल शुक्रवारी अंतरवाली सराटीत पाटलांची भेट घेऊन उत्तर मतदारसंघातील त्यांच्या उमेदवारीबाबत चर्चा केली. याआधी पाटलांकडे त्यांनी आपला उमेदवारी मागणी अर्ज दिला होता. उत्तर मतदार संघ तसेच ग्रामीण भागात राजन जाधव यांचा संपर्क हा दांडगा आहे. जाधव हे परिवहन समितीचे माजी सभापती आहेत.
मराठा आंदोलनातील नेते रवी मोहिते यांनी अंतरवाली सराटी या ठिकाणी जाऊन जरांगे पाटील यांच्याकडे उमेदवारी अर्ज दिला आहे. जिल्ह्यात जरांगे पाटील गटाच्या इच्छुकांच्या मेळाव्यात मोहिते आणि त्यांचे सहकारी उपस्थित होते. आरक्षण आंदोलनामध्ये मोहिते यांचा सक्रिय सहभाग असून ते उत्तर मधून इच्छुक आहेत. पाटलांच्या निकटवर्तीयांमध्ये त्यांचा समावेश होतो.
नुकताच बंडाचा इशारा देणारे शिवसेनेचे जिल्हाप्रमुख अमोल शिंदे यांनी भाजपच्या पाच जागा आम्ही पाडणार अशी गर्जना केली. उत्तर मतदारसंघातून गरज पडल्यास अपक्ष उभारणार असे त्यांनी माध्यमांशी बोलताना सांगितले. शिंदे हे माजी नगरसेवक असून शहरात जरांगे पाटील यांच्या सभेसाठी मोठ्या प्रमाणावर यंत्रणा उभा करण्यात त्यांचा सिंहाचा वाटा होता. छत्रपती शिवाजी महाराज चौकात झालेल्या सभेची चर्चा संपूर्ण राज्यभर झाली होती. आम्ही निवडून जरी नाही आलो तर किमान पाडू शकतो. हे त्यांचे वक्तव्य गाजत आहे.
स्वतः इच्छुक नसले तरी ऐनवेळी मराठा नेते माऊली पवार यांच्या उत्तर मधील उमेदवारी बाबत काहीही घडू शकते अशी चर्चा समाजामध्ये आहे. पवार हे जरांगे पाटील यांच्या चळवळीतील प्रमुख चेहरा असून जिल्ह्यातील सर्व तालुक्यात असणारा प्रचंड मोठा संपर्क ही त्यांची जमेची बाजू आहे. तर उत्तर मतदार संघात मराठा समाजासोबत इतर समाजासोबत त्यांचे स्नेह संबंध आहेत. पवार हे मनोज जरांगे पाटील यांचे निकटवर्तीय मानले जातात.
भाजपचे विद्यमान आमदार विजयकुमार देशमुख यांची उमेदवारी जाहीर झाली आहे.महाविकास आघाडीकडून माजी महापौर महेश कोठे यांनी तिकीट मिळवले आहे. तिकीट जाहीर होताच दोघांच्या समर्थकांकडून मोठा जल्लोष करण्यात आला आहे.
शरद पवार गटाकडून तुतारी या चिन्हावर कोठे हे निवडणूक लढवत आहेत.अपक्ष म्हणून माजी महापौर शोभा बनशेट्टी यांनी उमेदवारी अर्ज भरला आहे. बनशेट्टी यांना पक्षामधील असंतुष्ट गटांचा मोठा पाठिंबा मिळत आहे.
यंदा तगडी फाईट होण्याची चिन्हे असून जर मराठा समाजाचा उमेदवार उभारला तर मतांची विभागणी होऊ शकते.
