MH 13 News Network
शिवसेना उद्धव ठाकरे पक्षाने दक्षिण सोलापूर मतदारसंघातून अमर पाटील यांना उमेदवारी जाहीर केले आहे. मुंबईहून एबी फॉर्म घेऊन अमर पाटील सोलापूरला रवाना झाले आहेत. शिवसेनेचे खासदार संजय राऊत यांनी अमर पाटील यांना उमेदवारीसाठी शब्द दिला होता. तो त्यांनी पाळला असल्याची चर्चा सुरू झाली आहे.
खासदार संजय राऊत यांनी अमर पाटील यांच्या जाहीर कार्यक्रमात आमचे उमेदवार तुम्हीच असे ठासून सांगितले होते. अगदी त्याचप्रमाणे अमर पाटील यांना आज ठाकरे गटांकडून दक्षिण सोलापूर मतदारसंघातील उमेदवारी जाहीर झाल्याचे सांगण्यात आले.
शिवसेना संपर्कप्रमुख अनिल कोकीळ यांनी पत्रकारांशी बोलताना अमर पाटील यांना एबी फॉर्म दिला असल्याची माहिती दिली.
अमर पाटील यांचे वडील हे दक्षिण मधून आमदार होते. तर अमर पाटील हे तीन टर्म पासून स्वतः जिल्हा परिषद सदस्य आहेत. सिद्धेश्वर साखर कारखान्याचे संचालक असून बाजार समितीचे ते संचालक ही आहेत.
एक तरुण, अभ्यासू, उत्तम संघटन कौशल्य असणारा अशी त्यांची प्रतिमा आहे. उमेदवारी निश्चित झाल्याने त्यांच्या कार्यकर्त्यांमध्ये मोठा उत्साह संचारला आहे. काही वेळापूर्वी त्यांच्या घरासमोर कार्यकर्त्यांनी आनंदाने फटाके फोडले.
दक्षिणमध्ये कोण -कोण आहेत इच्छुक उमेदवार.!
दक्षिण सोलापूर विधानसभा मतदारसंघात भाजपच्या वतीने सुभाष देशमुख यांना पुन्हा एकदा उमेदवारी जाहीर करण्यात आली आहे. महविकास आघाडी मधील घटक पक्ष असलेला शिवसेना उद्धव ठाकरे पक्षाने आज अमर पाटील यांना उमेदवारी जाहीर केली आहे तर महाराष्ट्र नवनिर्माण सेनेकडून महादेव कोगनुरे, अपक्ष म्हणून सोमनाथ वैद्य हे इच्छुक आहेत.सिद्धेश्वर साखर कारखान्याचे संचालक धर्मराज काडादी, काँग्रेस नेते बाबा मिस्त्री, युवराज राठोड यांची परिवर्तन आघाडी , काँग्रेसचे नेते सुरेश हसापुरे यांनीही या विधानसभेसाठी दंड थोपटलेले आहेत.
माजी आमदार दिलीप माने यांनी सोलापूर दक्षिणची जागा जरी शिवसेनेला सुटली असली तरी आमचा आमचे नेते सुशीलकुमार शिंदे आणि प्रणिती शिंदे यांच्यावर विश्वास आहे,सध्या काँग्रेससोबतच आहे. अशी प्रतिक्रिया व्यक्त केली आहे.
