याराना : ‘युवराजां’ना ‘सोमनाथां’ची साथ ; जिल्ह्यातील बिग दहीहंडी उत्सव ‘दक्षिण ‘ मध्ये..

MH 13 News Network

यंदा सोलापुरात श्रीकृष्ण जन्माष्टमी निमित्त दहीहंडी उत्सव करण्यात येणार आहे. यात तब्बल पाच लाखाचे पहिले बक्षीस युवराज राठोड आणि सोमनाथ वैद्य यांनी जाहीर केल्याने शहरात आणि विशेष म्हणजे दक्षिण मध्ये मोठी चर्चा सुरू झाली आहे.

दक्षिण विधानसभेत यंदा कोणाला कौल मिळणार याबाबत सर्वपक्षीय राजकीय वर्तुळात चर्चा सुरू आहे. याच पार्श्वभूमीवर जिल्ह्यातील हॉट मतदार संघ बनलेल्या दक्षिण विधानसभा मतदार संघात जिल्ह्यातील सर्वात मोठा दहीहंडी उत्सव करण्याचे आयोजन सोनाई फाउंडेशन व स्वयंम शिक्षा फाउंडेशन यांनी संयुक्त विद्यमाने केले आहे.

सोनाई फाउंडेशनचे प्रमुख युवराज राठोड आणि स्वयंम शिक्षा फाउंडेशनचे प्रमुख सोमनाथ वैद्य यांनी भाजपातील आपापले गॉडफादर यांच्या भेटी घेऊन ”ग्राउंड” तयार करण्याचे काम जोमात सुरू केले आहे.

दहीहंडी उत्सवाच्या निमित्ताने हजारो गोविंदांसोबत थेट भेट आणि संपर्क युवराज राठोड आणि सोमनाथ वैद्य यांना होणार आहे. मुंबई आणि ठाण्यामधून दहीहंडी उत्सवाच्या माध्यमातून अनेक नेतेमंडळी उदयास आली. सध्या राजकारणात अशा दहीहंडीचे काही आयोजक आमदार, खासदार असून थेट मंत्री आहेत.

येत्या गुरुवार दिनांक 22 ऑगस्ट रोजी दुपारी ४ वाजता जुळे सोलापुरातील भंडारी ग्राउंड या ठिकाणी या दहीहंडी स्पर्धेचे आयोजन करण्यात आले आहे. यामध्ये ठाणे ,मुंबई, बारामती, पुणे येथील संघांची प्रमुख उपस्थिती असणार आहे अशी माहिती आयोजकांच्या वतीने देण्यात आली आहे.

भाजपचे हे नेते राहणार उपस्थित..

या दहीहंडी उत्सवाच्या कार्यक्रमाचे उद्घाटन माजी पालकमंत्री, उत्तर विधानसभेचे ज्येष्ठ आमदार विजयकुमार देशमुख व आमदार राम सातपुते यांच्या हस्ते होणार आहे. या कार्यक्रमाला उपमुख्यमंत्री देवेंद्र फडणवीस यांचे निकटवर्तीय आमदार सचिन कल्याणशेट्टी, फडणवीस यांच्या मर्जीतील विश्वासू नेते माजी जिल्हाध्यक्ष शहाजी पवार यांची प्रमुख उपस्थिती राहणार आहे.

या उत्सवाचे प्रमुख आकर्षण म्हणजे सिने अभिनेत्री संस्कृती बालगुडे व धनश्री काडगावकर यांची प्रमुख उपस्थिती लाभणार आहे.
या कार्यक्रमाला खूप मोठ्या प्रमाणावर गर्दी होण्याची शक्यता आहे.