सोलापूर, दि. 27 जुलै : सोलापूर जिल्हा क्रिकेट असोसिएशनतर्फे प्रथमच आयोजित करण्यात आलेल्या 12 वर्षांखालील ‘लिटिल चॅम्प’ क्रिकेट स्पर्धेचा बक्षीस वितरण समारंभ रविवारी (26 जुलै) सायंकाळी इंदिरा गांधी स्टेडियम, सोलापूर येथे उत्साहपूर्ण वातावरणात पार पडला. या स्पर्धेत तब्बल 200 बाल क्रिकेटपटूंनी सहभाग नोंदवत आपल्या कौशल्याची झलक दाखवली.समारंभाच्या अध्यक्षस्थानी सेवानिवृत्त एसीपी दीपक आरवे होते.
प्रमुख पाहुणे म्हणून डॉ. अतुल कुलकर्णी, डॉ. सुमित मोरे आणि मनोज भागवत उपस्थित होते. सोलापूर जिल्हा क्रिकेट असोसिएशनचे अध्यक्ष दिलीप रावजी माने, चेअरमन रणजितदादा मोहिते-पाटील, व्हाईस चेअरमन श्रीकांत मोरे आणि सचिव तथा खासदार धैर्यशील मोहिते-पाटील यांच्या मार्गदर्शनाखाली या स्पर्धेचे आयोजन करण्यात आले.यावर्षीपासून सुरू करण्यात आलेल्या या स्पर्धेसाठी 200 खेळाडूंचे 14 संघ तयार करण्यात आले. या संघांना सोलापूर जिल्हा क्रिकेट असोसिएशनसाठी उल्लेखनीय योगदान देणाऱ्या दिवंगत क्रिकेटपटूंची नावे देऊन त्यांना आदरांजली वाहण्यात आली.स्पर्धा यशस्वीपणे पार पाडण्यासाठी अनिल साम्रानी यांच्या अध्यक्षतेखाली स्वतंत्र निवड समिती स्थापन करण्यात आली होती.
योगेश कोंम्पल, राजेश येमुल, मुस्ताक खैराटकर, आनंद शेलार, सुनील शिंदे, निलेश गायकवाड आणि सचिव चंद्रकांत रेंबर्स यांनी स्पर्धेच्या आयोजनासाठी विशेष परिश्रम घेतले. ही स्पर्धा जुळे सोलापूर येथील भंडारी मैदानावर पार पडली.स्पर्धेत उत्कृष्ट कामगिरी करणाऱ्या खेळाडूंना प्रमुख पाहुण्यांच्या हस्ते पारितोषिके प्रदान करण्यात आली. तसेच स्पर्धेत सहभागी झालेल्या सर्व खेळाडूंना उपाध्यक्ष मुकुंद जाधव, माजी सचिव दिलीप बच्चूवार, टूर्नामेंट कमिटीचे चेअरमन संजय वडजे, ॲड. बसवराज सलगर, अनिल चोथे, किरण मणिहार, उदय डोके, निवड समिती सदस्य अनिल जाधव आणि डॉ. ढेंबरे यांच्या हस्ते सहभाग प्रमाणपत्रे देण्यात आली.स्पर्धेतील सामनावीर म्हणून वरद चिपडे, राजेश शिंदे, समृद्धी चट्टे, मो. रोमान शेख, दक्ष मोरे, अवनिश गरड, साहिल राजाणी, श्रीयान तिकटे, विराज टकले, अर्जुन पाटील, मीत गुडगुंटे, अब्दुल्ला शेख, प्रणव शिंदे, आदित्य चटके, वेंकटेश घाडगे, नमिष मिनियार, ओम धोत्रे, निखिल अलकुंटे आणि हर्षवर्धन सेन यांचा गौरव करण्यात आला.यावेळी अध्यक्ष दीपक आरवे यांनी बालपणापासूनच खेळाडूवृत्ती जोपासण्याचे महत्त्व सांगितले. डॉ. अतुल कुलकर्णी यांनी मुलांना क्रिकेटचा आनंद घेत सातत्याने सराव करण्याचे आवाहन केले, तर डॉ. सुमित मोरे यांनी सोलापूर जिल्हा क्रिकेट असोसिएशनने उपलब्ध करून दिलेल्या या संधीचा लाभ घेऊन खेळात प्राविण्य मिळवण्याचे आवाहन केले.कार्यक्रमाचे प्रास्ताविक व सूत्रसंचालन सुनील मालप यांनी केले. स्पर्धेचा आढावा राजेंद्र गोटे यांनी सादर केला, तर संतोष बडवे यांनी आभार प्रदर्शन केले.
