MH13 News network
वडदेगाव खून खटला | हॉटेल मालकासह कामगाराचा जामीन फेटाळला
सोलापूर : प्रतिनिधी
वडदेगाव (ता. मोहोळ) येथील दत्ता नागनाथ बागल याचा मृत्यू झाल्याच्या प्रकरणात हॉटेल मालक मंगेश सुरेश डोंगरे आणि त्याचा कामगार समर्थ संजय जगताप यांचा जामीन अर्ज जिल्हा व सत्र न्यायाधीश यू. एल. जोशी यांनी फेटाळला.
पैशांच्या व्यवहारावरून २५ एप्रिल २०२६ रोजी दत्ता बागल आणि मंगेश डोंगरे यांच्यात वाद झाला होता. हा वाद मिटविण्यासाठी २७ एप्रिल रोजी वडदेगाव-औंढी मार्गावरील कॅनालजवळ दत्ता बागल, त्यांचे पुतणे व इतर व्यक्ती गेले होते. त्यावेळी मंगेश डोंगरे व समर्थ जगताप तेथे आले.
फिर्यादीनुसार, मंगेश डोंगरे याने दत्ता बागल यांना शिवीगाळ करून चाकूने पोटात व छातीवर वार केले. त्यांना सोडविण्यासाठी गेलेल्या समाधान जाधव यांच्यावरही चाकूने वार करून गंभीर जखमी करण्यात आले. समर्थ जगताप याने शिवीगाळ करून लाथाबुक्क्यांनी मारहाण केल्याचे फिर्यादीत नमूद आहे.या प्रकरणी मयताचा पुतण्या विठ्ठल नरसु बागल यांच्या फिर्यादीवरून कामती पोलीस ठाण्यात गुन्हा दाखल करण्यात आला होता. आरोपींनी जामिनासाठी जिल्हा व सत्र न्यायालयात अर्ज केला होता.
सुनावणीदरम्यान पोलिसांनी सादर केलेली कागदपत्रे तसेच प्रत्यक्षदर्शी साक्षीदारांच्या जबाबांवरून आरोपींविरुद्ध प्रथमदर्शनी ठोस पुरावा असल्याचा युक्तिवाद करण्यात आला.
न्यायालयाने हा युक्तिवाद ग्राह्य धरत दोन्ही आरोपींचा जामीन अर्ज फेटाळला.सरकार पक्षातर्फे ॲड. आनंद गोरे, तर मूळ फिर्यादीतर्फे ॲड. मिलिंद थोबडे, ॲड. विनोद सूर्यवंशी, ॲड. संगम मोरे आणि ॲड. ओंकार भुसे यांनी काम पाहिले.
